ابوظہبی۔ 30اکتوبر (اے پی پی) پاکستان و نیوزی لینڈ نا کرکٹ ٹیم تا نیام اٹ مسہ ٹی ٹونٹی میچ آتیا تالان سیریز نا اولیکو میچ (اینو) چارشنبے نادے آ ابوظہبی ٹی گوازی کننگک۔ ہڑتوم آ ٹیم تا نیام اٹ میچ نائٹ مریک و پاکستان نا معیاری وخت انا رداٹ شام انا نہہ بجہ غا بناکیک۔ داکان مست پاکستان نا ٹیم کینگروز ءِ مسہ ٹی ٹونٹی میچ آتا سیریز اٹی کلین سوئپ کریسس۔ ہڑتوم آ ٹیم تا کیپٹن آک سیریز اٹی سرسہبی کن بیان تسنو و دااعتبار اٹ اومیت کننگ انگ ءِ کہ ہڑتوم آ ٹیم تا نیام اٹ سیریز سخت مریک و کرکٹ نا شونکی تے جوان ءُ میچ اس ہُننگ کن ملک۔ یات سلے کہ ہڑتوم آ ٹیم تا نیام اٹ سیریز نا ارٹ میکو ٹی ٹونٹی میچ 2نومبر آدبئی ٹی گوازی کننگک وخت اس کہ مسٹ میکو و آخیریکو ٹی ٹونٹی میچ 4نومبر آ ہندا جاگہ غا گوازی کننگک۔
