اسلام آباد۔ 29اکتوبر (اے پی پی) وزیر خارجہ شاہ محمود قریشی تون یورپی پارلیمنٹ نا سویلی ایشیا تون تعلقداری تا بارواٹ ڈل اوڑدہی کرے۔ ڈل انا سرکڑدہ ہی ءِ چیئرپرسن جین لیمپرٹ کریکہ۔ داوخت آ وزیر خارجہ پاکستان و یورپی یونین نا تعلقداری و پارلیمانی ہن و بر آتے ٹی مثبت نمو آ است جمی نا درشانی ءِ کرے۔ اوواپار و اقتصادی کمکاری خاص کر جی ایس پی پلس اسکیم آن فائدہ ہرفنگ نا گرج آ زورشاغا وپارے کہ دودوربیدگی و تعلیمی ڈل آتا ہن و بر و السی کہول آ رابطہ غاتا کمک اٹ تین پہ تینی رابطہ غاتے ودفنگ نا گرج ءِ۔ اوڑدہی ٹی تین پہ تینی است خواہی نا جہانی و علاقائی معاملہ غاتیا خیال آتا درشانی ءِ کننگا۔ وزیر خارجہ ڈل ءِ علاقائی امن و شونہالی نا مون آ دننگ کن پاکستان نا کوشست آتا بارواٹ معلومدار کرے۔ اومقبوضہ کشمیر اٹی بھارتی کوزہ گر فوج انا کنڈآن انسانی حق انا سنگین خلاف ورزی تا ساڑی آ لہر ءِ ہم تالان کرے و یورپی پارلیمنٹ آ زور شاغا کہ جموں و کشمیر نا بارواٹی اقوام متحدہ نا انسانی حق انا کمیشن نا رپورٹ آ السی موقف اختیار کننگے۔ یورپی یونین نا ڈل پاکستان نا کنڈآن سیاسی و اقتصادی بشخ خاص کر جمہوریت ، انسداد دہشت گردی و انسانی حق انا بشخ آتے ٹی نمان پیش رفت نا اعتراف ءِ کرے و حکومت پاکستان تون آخبت اٹی کمکاری ءِ برجاتخنگ نا یخین دہانی کرفے۔
