وزیر دفاع پرویز خٹک تون ترک سفیر مصطفی یاردکل نا اوڑدہی، تین پہ تینی است خواہی نا معاملہ غاتیا خیال آتا درشان

راولپنڈی۔ 29اکتوبر (اے پی پی) وزیر دفاع پرویز خٹک تون ترک سفیر مصطفی یاردکل راولپنڈی ٹی اوڑدہی کرے ہراٹی تین پہ تینی است خواہی نا معاملہ غاتیا خیال آتا درشانیءِ کننگا۔ وزیر دفاع پارے کہ پاکستان و ترکی تینا بے مثال تعلقداری تے پین مون آ دیرہ۔ دا تعلقداری تا بنداو اسیجا یخین، اقتدار ، تہذیب ، تہذیبی رابطہ، تاریخ وتین پہ تینی پت ءِ۔ وزیر دفاع طیب اردگان نا بے مثال سرکڑدہ ہی ٹی ترکی نا شونہالی و شونداری نا ستاءِ کرے، وزیر دفاع کشمیرنا ویل آ ترکی نا سوگو مخ تفی نا ستاءِ کرے۔ اونا ورندی ٹی سفیر موصوف ہڑتوم آ ملک آتا نیام اٹ تین پہ تینی ہڑتوم آ کنڈآتا است خواہی نا معاملہ خاص کر دفاعی بشخ اٹی برادرانہ تعلقداری تا مون آ دننگ آ خیال آتا درشانی ءِ کرسا پارے کہ او تینا سفارت اٹی ہڑتوم آ ملک آتے ٹی پین بشخ آتے ٹی تین پہ تینی شونداری کن پین کمک و تعلقداری تے پین سوگو جوڑ کیک۔ بنجائی وزیر ترک سفارت خانہ ٹی ترک قومی دے انا بابت اڈتروک آ دود اٹی ہم شرکت کرے۔ ترک سفیر بنجائی وزیر ءِ اونا تعیناتی آ مبارکباد پیش کرے۔