اسلام آباد۔ 06دسمبر (اے پی پی) وزیراعظم نا خصوصی کمکار امور خارجہ طارق فاطمی پارینے کہ پاکستان نہ صرف اوغانستان بلکن مچ آ ڈیہہ ٹی امن نا مون آ دننگ کن اہم کڑدادا کننگ کیک ۔ کشمیر نا ویل انا ایسری کن پاک بھارت مذاکرات نا گرج ئِ۔ وزیراعظم محمد نواز شریف نا اقتدار اٹی بننگ آن پد پاکستان و امریکہ نا تعلقداری تا اسہ پوسکن ئُ باب اسے نا بناءمسنے۔ دوشنبے آ واشنگٹن اٹی پاکستانی سفارت خانہ ٹی امریکی پرنٹ و الیکٹرانک میڈیا نا نمائندہ غاتون ہیت وگپ کرسا اوپارے کہ پاکستان پوسکن آ امریکی انتظامیہ تون خڑکی وڑاٹ کاریم کننگ و آخبت اٹی ہڑتوم آ کنڈآتا تعلقداری تے پین سوگو جوڑ کننگ ناخواہندار ئِ۔ پوسکن آ امریکی صدر ڈونلڈ ٹرمپ نا کنڈآن اقتدار ئِ سنبھالنگ آن گڈ پاکستان امریکہ تون ہڑتوم آ کنڈآتا تعلقداری تے پین گچین جوڑ کننگ کن بامسخت رابطہ غاتا خواہندار ئِ و علاقائی و جہانی معاملہ غاتا بابت اہم کڑدادا کننگ ئِ۔ اوپارے کہ امریکہ تون پاکستان نا اہم ئُ مفاد ئُ و ہڑتوم آملک آک علاقائی و جہانی کہول آ امن نا مون آ دننگ کن مسکوہی ہفت عشرہ غاتیان زیات وخت آن کاریم کننگ ئُ۔ اوپارے کہ پاکستان سرد جنگ انا وخت امریکہ تون سلیس و داسہ مسکوہی کیہی سال آتیان دہشت گردی نا برخلاف جہانی جنگ اٹی صف اول نا ملک ئِ۔ دہشت گردی و انتہاءپسندی نا چٹفنگ کن پاکستان نا غیر متزلزل عزم انا درشانی ئِ کرسا اوپارے کہ دا جنگ اٹی پاکستان نا بھلو جانی نسخان اس مس۔ ننا پنچ ہزار فوجی ورناشہید مسر۔ پاکستان تینا قطبی علاقہ و پاک اوغان سیم انا خڑک آتیٹی 20ہزار آن زیات فوجی تعینات کرینے و دہشت گرد آتا نیٹ ورک و اوفتا کمین جاٹ آتا چٹفنگ کن پاک فضائیہ نا ایف 16جہاز آتا کمک اٹ پورو واک اتون تینا فوجی تا کمک ئِ کننگ انگ ئِ۔ اوپارے کہ دا اسہ سخت ئُ کاریم اسے۔ پاکستان دانا بھلو نہاد اس تسنے۔ پاکستان اٹی داسہ دہشت گردی نا بے کچ کم واقعہ غاک مننگ ئُ۔ دہشت گرد آک نرنگ اٹی ئُ ہرا مایوسی نا حالیت اٹی آسان ہدف آتے نشانہ جوڑ کننگ ئُ۔ اوپارے کہ پاکستان نیشنل ایکشن پلان آ پورو وڑعمل کننگ ئِ و مچ آ قوم ہروڑنا دہشت گردی آن نجات کن پرعزم و متحدئُ۔ اودیرینہ جھیڑہ کشمیر نا ایسری کن پاکستان و بھارت نا نیام اٹ مذاکرات نا گرج آ زورشاغا و پارے کہ مقبوضہ کشمیر اٹی کشمیری تا ہندی تحریک جاری ئِ ہرادے بھارتی حکومت انسانی حق انا سنگین خلاف ورزی تا کمک اٹ توننگ نا کوشست کننگ ئِ۔ بے گناہ کشمیری تیا خصوصی توفک آتے اٹ سم کاری کرسا 600 بندغ نا بینائی ئِ نسخان رسیفنگا۔ داکان بیدس ساڑی آ توتیٹی سیز فائر نا خلاف ورزی ٹی ہم ودکی مسنے۔ بے گناہ شاری تے نشانہ جوڑ کننگ انگ ئِ ہرادے جنگ انا وخت آہم خننگ تنے۔ طارق فاطمی پارے کہ اینو نا پاکستان بالکل جتا ئِ ۔ ہراوخت آن وزیراعظم محمد نواز شریف حکومت اٹی بسنے، پاکستان و امریکہ نا تعلقداری تیٹی اسہ پوسکن ئُ دور اسے نا بناءمسنے۔ نن دہشت گردی نا چٹفنگ کن نیشنل ایکشن پلان آ عمل کننگ اُن۔ پاکستان توانائی نا تنکی نا مون ئِ توننگ کن اقتصادی محا ذآ مست آن ہی سدابہار شونداری ہلکونے۔ کراچی ٹی امن و ایمنی نا حالیت آک بھاز صفائُ ۔ پاکستان اسٹاک ایکسچینج کارکڑد بے مثال ئِ ہرانا مچ آ دنیا ٹی ستاکننگ انگ ئِ۔ اوپارے کہ پاکستان اوغانستان اٹی امن نا دوئی کن امریکہ نا پوسکن آ انتظامیہ تون کمک کیک و ڈیہہ ٹی امن کن بھارت تون تعلقداری تیٹی گچینی اتیک ۔
