اسلام آباد ۔ 20 جون (اے پی پی) وزیراعظم محمد شہباز شریف پی این ایس سی نا بیڑہ ٹی ودکی کن لیز آ بحری جہاز ہلنگ نا پارت کرساپارینے کہ اِراہفتہ ٹی پی این ایس سی نا بزنس پلان اس پیش کننگے ہراٹی قومی خزانہ غان سالانہ 4 بلین ڈالر نا بھاریم ءِ چٹفنگ نا لائحہ عمل اوار مرے۔ جمعہ نادے آ وزیراعظم آفس نا میڈیا ونگ آن جاری بیان نارداٹ وزیراعظم محمد شہباز شریف نا کماشی ٹی پاکستان نیشنل شپنگ کارپوریشن نا امور آ جاچ دیوان اس اڈ ہلک۔ وزیراعظم پی این ایس سی نا بیڑہ ٹی ودکی کن لیز آ بحری جہاز ہلنگ نا پارت کرسا پارے کہ پی این ایس سی نا بیڑہ ٹی بحری جہاز کم مننگ نا سوب آن سمندر نا کسر واپار آ قومی خزانہ غان سالانہ 4 بلین ڈالر نا نہادی زرمبادلہ خڑچ کروئی تمنگ ءِ۔ وزیراعظم پارت کرے کہ اِراہفتہ نا تہہ ٹی پی این ایس سی نا بزنس پلان اس پیش کننگے ہراٹی قومی خزانہ غان سالانہ 4 بلین ڈالر نا بھاریم ءِ چٹفنگ نا لائحہ عمل اس اوار مرے۔ وزیراعظم ءِ پی این ایس سی نا کارکڑد آ حوال اٹی پاننگاکہ ادارہ تون چندی وڑنا دہ بحری جہاز ءُ ، ہراکہ724،643ٹن کارگودننگ نا لائخی تخرہ۔ دیوان اٹی بنجائی وزیر اقتصادی امور احدخان چیمہ، بنجائی وزیربحری امور جنید انور چوہدری و پی این ایس سی نا بڑزکو کمامدارآک ہم شریک ئسر۔
