اسلام آباد۔ 20 جون (اے پی پی ) وزیراعظم نا خصوصی کمکار صنعت وپیدوار ہارون اخترخان پارینے کہ حکومت نا کنڈآن درستی راستی کرفوک قومی انرجی وہیکل پالیسی 2025-30پاکستان کن اسہ تاریخی و انقلابی گام اسے ہرانئے بیرہ چاگڑدی رکھ ، بلکن صنعتی شونداری و توانائی نا بشخ اٹی خودکفالت نا بنداوءِ تخک۔ داخیال آتا درشانی ءِ او جمعہ نادے آ اڈ ہلوک اسہ ورکشاپ اسے آن تران کریکہ ہراٹی چاہندار، صنعت کار، چاگڑدی ادارہ و زرکارآک بشخ ہلکر۔ ہارون اختر خان پارے کہ وزیراعظم شہباز شریف نا وژن ءِ کہ 2030اسکان پاکستان اٹی بہامروک 30 درسد پوسکن گاڈی الیکٹرک مریر ۔ دا ہدف نا دوئی کننگ کن بنجائی حکومت اسہ جوان ءُ حکمت عملی اس مرتب کرینے، ہرا سبسڈی ، انفراسٹرکچر، صنعتی پیدواری کچ، و چاگڑدی ہدف آتیا تالان ءِ۔ اوپارے کہ پالیسی آ عملدرآمد اٹی سالانہ 4.5 ملین ٹن کاربن ڈائی آکسائیڈ نا پیش تمنگ اٹی کمتی بریک، 1 ارب ڈالر اسکان نا بچت تیل انا درآمد آتیٹی گمانی ءِ، 405 ارب روپئی سالانہ جان جوڑی نا بشخ اٹی چاگڑدی کچٹی آن بچفنگ نا رداٹ بچت مریک، 126 ٹیراواٹ آور ودکی بجلی نا گچین کاریم اٹ اتنگ ءِ ممکن کننگک۔ اوپارے کہ پالیسی نا رداٹ الس ءِ ہم براہ راست سبسڈی تننگ انگ ءِ، اِرا ٹیر والا الیکٹرک گاڈی تیا 65،000 روپئی سبسڈی، مسہ ٹیر والا گاڈی تیا 400،000روپئی سبسڈی ، چار ٹیر والا گاڈی تیا 15،000روپئی فی کلوواٹ آور نا حساب اٹ سبسڈی تننگک۔ ہارون اخترخان پارے کہ 2025اسکان پاکستان نا اہم شاہراہ (ہائی ویز) آ 40 فاسٹ چارجنگ اسٹیشنز فعال کننگک، صوبہ غاتے پارت کننگانے کہ او الیکٹرک گاڈی تا رجسٹریشن ءِ فری کیر تانکہ السی قبولیت اٹی ودکی مرے ۔ خصوصی کمکار پارے کہ پوسکن آ پالیسی صنعتی بشخ اٹی ہندی مینوفیکچرنگ ءِ مون آدننگ ءِ، داتم اسکان 57 ہندی کمپنی تے مینو فیکچرنگ سرٹیفکیٹس جاری کننگانے، 90 درسد اسکان ہندی پڑزہ غاتا تیاری (لوکلائزیشن) پورو مسنے، جہانی کمپنیک ہم پاکستان اٹی زرکاری نا خواہندار ءُ۔ اوپارے کہ پوسکن آ انرجی وہیکل پالیسی پنچ اہم تمبہ غاتیا تالان ءِ، سبسڈی اسکیم، ٹیرف(خراج/ڈیوٹی ٹی چھوٹ) ، انفراسٹرکچر نا شونداری، آب اٹ نظام(کوالٹی و رکھ) ، ادارہ جاتی فریم ورک و پالیسی انٹیگریشن ، چاگڑدی و اقتصادی فائدہ غاک اوار اوار ءُ۔ ہارون اخترخان پارے کہ داپالیسی آن ہراڑے چاگڑدی کچٹی ٹی کمتی بریک، ہموڑے روزگار نا پوسکن ءُ وارخواہی، ہندی انڈسٹری نا بحالی، و السی آسراتی ءِ مون آدننگ ملک۔ اوپارے کہ دا بیرہ اسہ ٹرانسپورٹ پالیسی اس اف بلکن اسہ قومی اقتصادی وژن اسے ہراپاکستان ءِ آخبت نا کنڈآ دیک۔
