اسلام آباد۔ 20 جون (اے پی پی) بنجائی وزیر ریلوائی محمد حنیف عباسی نا کماشی ٹی دیوان اس اڈ ہلک ہراٹی پاکستان ریلوائی نا بابت برجاجاست وپاست آتا جاچ ءِ ہلنگا۔ داوخت آ ٹرین شکست، ریل کاپ بے ڈولی و ایلو امور تیاسرجمی اٹ حوال تننگا۔ جون 2025اٹی سکھر ، ملتان و پشاور اٹی شکست آتا جاچ ءِ ہلنگا، ساڑی آ ٹرین تا پٹڑی آن دڑنگ انگ نا ودوک آ واقعہ غاتا چندی پلو آتا جاچ ءِ ہلنگا۔ وزیر ریلوائی پارے کہ سلاہ و سوج و آخبت نا لائحہ عمل اس تیارکرسا مجاز اتھارٹی ءِ جمع کرفنگے، داکان بیدس عوام ایکسپریس نا کراچی آن روانگی ٹی تاخیر آہم رپورٹ بٹنگا۔ وزیرریلوائی پارے کہ خانیوال اٹی فٹ اووربرج انا واقعہ غا رپورٹ زوت جمع کرفنگے، شاہین آباد کوارری نا بند مننگ نا باندات نا زمواری نا تعین ءِ کننگے۔ وزیرریلوائی ءِ پاننگاکہ ریل کاپ اٹی بے ڈولی تیا فیکٹ فائنڈنگ انکوائری آخیریکو ریسہ غاتیٹی ءِ، ہرانا کماشی ءِ آئی جی پی آرپی کننگ ءِ۔ بے ڈولی تیٹی اوار آفیسر آتا برخلاف فوجداری کارروائی نا سفارش کننگانے ۔ ایف آئی اے نا کمک اٹ ریل کاپ کیس انا جاست وپاست نا سلاہ ہم تننگا۔ وزیرریلوائی وڈی خوری آ زیروٹالرنس نا درشانی ءِ کرے، دیوان اٹی ایلو مالی و انتظامی پنجرنا بابت امور آتیا ہم سجفنگا۔ وزیرریلوائی کارکڑد نشان تفروک آ عملہ نا برخلاف سخت ایکشن نا عندیہ تس۔ اوپارے کہ گچین کارکڑد آ انعام و سفتی سند تننگک۔
