اسلام آباد۔ 06دسمبر (اے پی پی) امریکی محکمہ خارجہ نا انڈرسیکرٹری اقتصادی امور، توانائی و ماحولیات کیتھرین اے نوویلی بنجائی وزیر خزانہ سینیٹر اسحاق ڈار تون ٹیلی فون آ رابطہ کرے و ساڑی آ حکومت نا کنڈآن مسکوہی مسہ سال انا وخت مائیکرو اکنامک سوگوی و گورننس اٹی گچینی کن کروک آ اصلاحات و جیرت مندانہ گام گیج آتا ستائِ کرے۔ داوخت آ وزیر خزانہ امریکہ نا کنڈآن کمک و امداد آ منت واری ئِ ادا کرے ہراٹی پاکستان و امریکہ نا نیام اٹ سرکاری و نجی بشخ اٹی ہڑتوم آکنڈآتا رابطہ غاک ودانو۔ کیتھرین اے نوویلی دااومیت نا درشانی ئِ کرے کہ وزیر خزانہ اسحاق ڈار نا دورہ واشنگٹن نا دروشم اٹی او ہڑتوم آ کنڈآتا اقتصادی کمکاری آ ہیت و گپ کننگ کیرہ۔ اوپارے کہ پاکستان اٹی نمو ٹی ودکی کن ہڑتوم آ کنڈآتا اقتصادی کمکاری پوسکن آ امریکی صدر ڈونلڈ ٹرمپ نا حکومت نا رداٹ ہم ہندا جوز و جوزہ تون برجاسلرہ۔ وزیر خزانہ امریکہ تون جاری ہڑتوم آ کنڈآتا اقتصادی اصلاحات آ است جمی نا درشانی ئِ کرسا دا اومیت ئِ ظاہر کرے کہ پوسکن گچین مروک آامریکی صدر نا انتطامیہ تون تعلقداریک زیات مریرہ۔ ہڑتوم آ راہشونک تین پہ تینی مفاد اٹی ہڑتوم آ کنڈآتا اقتصادی کمکاری کن اواری اٹ کاریم کننگ آ اتفاق کریر۔
