ہیملٹن۔ 24نومبر (اے پی پی) پاکستان نا کرکٹ ٹیم نا مایہ ناز وکٹ کیپر بلے باز سرفراز احمد پارینے کہ نیوزی لینڈنا دوتے ٹی اولیکو ٹیسٹ میچ اٹی شکست آن مایوسی مس، ارٹ میکو و آخریکو ٹیسٹ میچ اٹی میزبان ٹیم ئِ شکست ترسا سیریز نا ایسری ئِ بریبری آ کینہ۔ اوپارے کہ اولیکو ٹیسٹ میچ اٹی باتننگ نا باوجود ٹیم نا حوصلہ پست متنے بروک آمیچ اٹی میزبان ٹیم ئِ شکست تننگ کن سرتوڑ کوشست کینہ۔ نیوزی لینڈ نا ٹیم پاکستان ئِ اولیکو ٹیسٹ میچ اٹی 8وکٹ آتیان باترفیسس۔ تینا اسہ بیان اسے ٹی سرفراز احمد پارے کہ کٹنگ و باتننگ گوازی نا بشخ اسے، میزبان ٹیم نا دوتے اٹ اولیکو ٹیسٹ میچ اٹی شکست نا باوجود ٹیم نا حوصلہ پست متنے۔ اوپارے کہ میزبان ٹیم ئِ ارٹ میکو میچ اٹی شکست تننگ کن گوازی گر تے گوازی نا غٹ بشخ آتیٹی عمدہ کارکڑد نا درشانی ئِ کروئی مریک۔ پاکستان و نیوزی لینڈ نا کرکٹ ٹیم تا نیام اٹ ارا ٹیسٹ میچ آتیا تالان سیریز نا ارٹ میکو و آخریکو ٹیسٹ (اینو) جمعہ آ ہیملٹن اٹی بناءکیک۔ سرفراز احمد پارے کہ کیویز ئِ ارٹ میکو میچ اٹی باترفنگ چیلنج اسے آن کم اف ولے پورو تیاری اتون میدان اٹ برینہ۔ سرفراز احمد مستی پارے کہ ننے سخت حریف نا برخلاف سرسہبی دوئی کننگ کن مربوط حکمت عملی نا رداٹ میدان اٹ دڑنگوئی مریک۔