اسلام آباد۔ 25اکتوبر (اے پی پی) بنجائی وزیر انسانی حق کامران مائیکل پولیس ٹریننگ سینٹر کوئٹہ آ دہشت گرد آتا جلہو نا ترندی اٹ مذمت ئِ کرینے و پارینے کہ دہشت گرد و اوفتا کمکار آتا پورو چٹفنگ اسکان جنگ برجاءسلک۔ سے شنبے آ جاری بیان اٹی بنجائی وزیر جلہو اٹی قیمتی انسانی جان تا زیان آ ڈکھ و افسوز نا درشانی ئِ کرے و ٹھپی کارندہ غاتا زوت جان جوڑی کن دعا کرے۔ اوپارے کہ دہشت گرد آتا بزدلانہ جلہو نا اخس کہ مذمت ئِ کننگے کم ئِ۔ دہشت گرد آک تینا لغور انگا جلہو آتیان دہشت گردی نا برخلاف جنگ اٹی قوم انا غیر متزلزل عزم ئِ نزور کننگ کپسہ۔ اوپارے کہ پاکستانی قوم دہشت گردی و انتہاءپسندی نا پورو صفایا ئِ کننگ نا پکا عزم کرینے۔ قوم انا اتحاد و اتفاق دہشت گرد آتا ناپاک عزم ئِ مش تے اٹ ملفک۔ کامران مائیکل یک شنبے آ دعا نا دے اڈتننگ نا پڑو ئِ کرسا پارے کہ دا دے مچ آ ملک اتون اوار ہراڑے ہراڑے پاکستانی مسیحی ارے او گرجاگھر آتیٹی خصوصی دعائیہ عبادت آتا انعقاد ئِ کیر۔ اوپارے کہ پاکستانی مسیحی ایڑ ایلم ، غمزدہ خاہوت آتے کن دعا گوئُ و دعا ئِ کہ خدا ننا زیبا انگا وطن ئِ دہشت گردی و اونا سوگوی نا برخلاف مروک آ سازش آتیان بچفے۔
