راجی اسمبلی ءَ بجٹ ءِ سر ءَ بحث برجاہ اِنت، باسک آئی ٹی، اے آئی، کشت ءُ کشاری ءُ بجلی ءُ توان ءِ نرخ آنی تہ ءَ کمی ءِ واستہ جامع گامگیج آنی لوٹ کن اَنت

اسلام آباد۔17جون  (اے پی پی): راجی اسمبلی ءَ چار شمبے ءِ روچ ءَ آیوکیں مالی سال ءِ وفاقی بجٹ ءِ ھوالگ ءَ بحث برجاہ بوت۔ بجٹ ءِ جتاجتائیں تک ءُ پھناتانی سر ءَ جتاجتائیں گلاں گوں سیادی داروکیں باسک آں وتی حیال ءُ لیکہ درشان کت انت ءُ سوج ءُ سفارش پیش کت انت۔ باسکاں آئی ٹی، اے آئی، زراعت ءُ بجلی ءُ توان ءِ نرخ آنی تہ ءَ کمی ءِ واستہ جامع گامگیج آنی لوٹ کتگ، مالیاتی خسارہ ءِ کنٹرول ءِ واستہ اولویت آناں نوکیں رنگ ءَ جوڑ کنگ ءِ لوٹ کتگ۔ باسکاں شیر ءُ المی سامان آنی سر ءَ ٹیکس ءِ شرح ءَ را کم کنگ ءُ فارمولہ ءُ جائیداد ءِ سر ءَ ٹیکس ءِ سر ءَ چار ءُ تپاسی کنگ ءِ ھم تجویز پیش کتگ۔ چار شمبے ءِ روچ ءَ راجی اسمبلی ءَ آیوکیں مالی سال ءِ وفاقی بجٹ ءِ سر ءَ بحث ءَ بھر زوری کنان ءَ پیپلز پارٹی ءِ شازیہ مری ءَ بجٹ، دری پالیشی، گلگت بلتستان، صوبائی ھک، مہنگائی، بے نظیر انکم سپورٹ پروگرام، بلوچستان ءِ بے رھبندی، ورنا ءُ… آئی ءَ پاکستان ءِ امن ءِ کوشست ءُ ملک ءِ سروکی ءِ سفارتی سوبمندی آناں ساڑات۔ شازیہ مرری ءَ مہنگائی ءِ گیش بوھگ ءُ تنگدستی ءِ سرا دلپروشی درشان کتگ ءُ گشتگ کہ اے جاور ھال ءَ راجی جیڈھ گیش بوھگ ءَ انت، حکومت گران بہائی ءِ گر ءُ دار ءِ واستہ گامگیج چست بہ کنت۔ آئی ءَ صوبائی وت واجہی ءِ رکھینگ ءُ این ایف سی ایوارڈ ءِ سر ءَ زور پر دات ءُ بی ایس پی ءِ مھکمیں حمایت کت ءُ اے گریبیں راج ءِ واستہ المی لیک ات۔ شازیہ مری ءَ فلسطین ءِ الس ءَ گوں یکوئی ءِ درشانی کتگ ءُ اسرائیل ءِ زلم ءُ زوراکی آناں ایر جتگ ءُ بلوچستان ءِ دیمروئی، وسیلگ آنی تہ ءَ دمگی ھک ءُ روزگار ءِ موہ آنی تہ ءَ گیشی ءِ ضلورت ءِ سر ءَ زور پر داتگ۔ آئی ءَ پیسریگیں مزن وزیر ءِ نام ءَ منصوبگ آنی نام ءُ بالی پٹ ءِ بحالی ءِ لوٹ کتگ ءُ ورنا آنی واستہ جوانیں وانگ ءُ زانگ، روزگار ءُ جوانیں موہ پیداک کنگ ءِ ضلورت ءِ سر ءَ زور پر داتگ۔ شازیہ ماری ءَ گوشت کہ 138ارب ڈالر ءِ درائیں ذمہ واری آنی رد ءَ نوکیں ٹیکنالوجی، ھیال ءُ لیکہ آنی سر ءَ بنیات ءِ سر ءَ اقتصادی گامگیج وھد ءِ ضلورت اِنت۔ اپوزیشن ءِ باسک بیرسٹر گوہر خان ءَ گوشت کہ ما جمہوریت، ایوان ءُ آجوئیں عدلیہ ءِ واستہ بے شرطیں کمک ءِ واستہ تیار ایں ۔ مئے لوٹ آئینی ءُ قانونی اَنت۔ نیک راھی ءِ جذبہ ءَ اقبال آفریدی ءِ باسکی ءِ مھتل کنگ دیر کنگ بہ بیت دانکہ آ وتی راج ءِ نمائندگی ءَ بہ کنت۔ بجٹ ءِ سر ءَ ایراد گرگ ءَ آئی ءَ گوشت کہ بجٹ ءَ کاروباری ادارگ، ورنا، ءُ جتا جتائیں تبک آنی واستہ امدادی گامگیج ھوار نہ اَنت۔ کسٹم سیلز ٹیکس ءِ تہا یک آزاد اسکروٹنی کمیٹی ءِ جوڑ کنگ بوھگ ءَ انت۔ اے پیسلہ پدا واتر کنگ بہ بیت۔ بے دیمیں نظامے دیم ءَ آرگ بوھگ ءَ اِنت کہ غیر آئینی اِنت۔ آئی ءَ گوشت کہ بونیر پد منتگیں دمگ انت۔ کراچی ءَ بُنر ءِ جنکے بیران بوتگ۔ وھدے کہ آئی ءِ لاش پدا آرگ بوھگ ءَ ات گڑا میر پور خاص ءَ لاش آرگ ءِ ھاندان ءَ لٹ ءُ پُل کتگ ات۔ گوستگیں سال ءِ اگست ءَ بونیر ءَ سیلاب ءَ 41 مردم بیران بوتگ کہ ایشی ءِ تہ ءَ ایوک ءَ 20 ریلیف چیک شنگ کنگ بوتگ اَنت۔ باقی چیک زوت شنگ کنگ بہ بنت۔ بنیر ایکسپریس وے پی ایس ڈی پی ءِ تہا ہوار کنگ بہ بیت۔ رانا انسر ءَ گوشت کہ ایران ءُ امریکا ءِ امن معاہدہ ءِ سر ءَ سرجمیں دگنیا پاکستان ءِ توسیپ ءَ کنگ ءَ انت، ایشی ءِ واستہ مزن وزیر محمد شہباز شریف، فیلڈ مارشل عاصم منیر، وزیر ءِ تہی کار ءُ وزارت ءِ درئی کار مبارکی ءِ مستحق انت۔ آئی ءَ گوشت کہ بجٹ ءَ زالبول آنی استحصال ءُ آوانی دیمروئی ءِ ھلاپ ءَ ھچ وڑیں پالیشی جوڑ نہ بوتگ، پی ایس ڈی پی ءَ حیدرآباد سککر موٹروے ءِ واستہ فنڈز ءِ پجارینگ وش آتک کنگ بیت، کرپشن ءِ وئیل آنی گر ءُ دار ءِ واستہ فنڈ جوڑ کنگ بہ بیت، سرکاری کارندہ آنی پگار گیش کنگ بہ بنت، ٹیکس ءِ کمی ءِ سر ءَ اولویت گیش کنگ بہ بنت۔ دودھ ءُ المی چیزانی تہ ءَ کمی کنگ بہ بیت ءُ فارمولہ دودھ ءِ سر ءَ ٹیکس ءِ سر ءَ چار ءُ تپاسی کنگ بہ بیت۔ ن لیگ ءِ راجا خرم شہزاد ءَ گشتگ کہ پاکستان ءِ مزن وزیر ءُ فیلڈ مارشل عاصم منیر ءِ سبب ءَ پاکستان دنیا ءِ تہا امن ءِ سفیر جوڑ بوتگ، آیوکیں مالی سال ءِ وفاقی بجٹ متوازن انت ءُ حکومت ءَ جتا جتائیں شوبگاں ریلیف دیگ ءِ کوشست کتگ۔ آئی ءَ گوشت کہ وفاقی دارالحکومت ءَ وانگ ءُ زانگ ءِ دو نظام است انت، اسلام آباد ءِ کش ءُ گور ءُ میتگی دمگ آنی تہ ءَ کوھنیں وانگجاہ آناں بحال کنگ المی انت ءُ استاد آنی پھجاری ءَ را دل یکیمی کنگ بہ بیت، اے آئی ءُ آئی ٹی ءِ نوکیں وانگ ءُ زانگ ءِ آسراتی توامیں سرکاری وانگ جاہ آنی تہ ءَ پجاری کنگ بہ بنت۔ اسلام آباد ءَ آپ ءِ ھوالگ ءَ جیڈھ کم کم ءَ گیش بوھگ ءَ انت ءُ اے آیوکیں وھد ءَ سنگینیں جاور ھال جوڑ بوت کنت، وفاقی دارالحکومت ءَ آپ ءِ رسگ ءِ ھاترا گیشیں کسانیں ڈیم ءِ ضلورت انت۔ آئی ءَ گوشت کہ اسلام آباد ءَ را نمونہ شہر جوڑ کنگ ءِ واستہ دیہی دمگ آنی تہ ءَ سڑک آنی بنیاتی ڈھانچہ ءُ گند ءُ نند ءِ نظام ءَ را نوک کنگ بہ بیت۔ ملک ءِ دوریں دمگاں چہ مردم دارالحکومت ءِ دو مزنیں سرکاری نادراھجاہ آنی تہ ءَ علاج ءِ واستہ آیگ ءَ اَنت کہ ایشی ءَ چہ دمگی مردماں طبی آسراتی ءِ پھجارینگ محدود بوھگ ءَ اِنت، دارالحکومت ءَ نوکیں نادراھجاہ جوڑ کنگ المی اِنت۔ اپوزیشن ءِ امجد علی خان ءَ گشتگ کہ ما پاکستان ءِ جوڑ بوھگ ءَ چہ معیشت وامدار جوڑ کتگ، معاشی آجوئی ءَ ابید سیاسی آجوئی ممکن نہ انت، سامراج ءَ ہمے بنیاد ءَ نوکیں نوآبادیاتی نظام اڈ کتگ، اے نظام ءِ تہا طاقت ءِ وسیلہ مہلوک نہ انت بلکیں وام دیوک انت۔ آئی ءَ گوشت کہ 18کرب کلدار ءِ بجٹ ءِ تہ ءَ 1.6کرب کلدار پنشن، بی آئی ایس پی ءُ سبسڈی ءِ سر ءَ ھرچ کنگ بوھگ ءَ اِنت وھدیکہ انسانی دیمروئی ءِ واستہ ایوک ءَ 10درسد ایر کنگ بوتگ۔ ملک ءِ تہ ءَ میلیوناں مردم چہ گریبی ءِ لیکہ ءَ چیر ءَ زند گوازینگ ءَ اَنت، 7درسد ورنا بے روزگار اَنت کہ ایشانی کساس ھر سال یک میلیون ءَ گیش بوھگ ءَ اِنت۔ بید اولویت بهداشت و تعلیم ءَ توسعہ ممکن نہ انت۔ معیشت ءِ دیمروئی ءِ واستہ دلیری ءِ پیسلہ کنگ لوٹ ایت۔ ما دیمروئی بجٹ ءِ سر ءَ دلگوشی دیگ ءَ ابید اقتصادی دیمروئی ءَ را رس اِت نہ کن ایں، ملاکند ڈویژن ءَ ٹیکس ءِ رعایت ءِ وھد ءَ را گیش کنگ بہ بیت۔ پیپلز پارٹی ءِ قومی اسمبلی ءِ باسک ناز بلوچ ءَ گشتگ کہ ملک ءَ موسمیاتی بدلی ءِ مزنیں چیلنج ءِ دیم ءَ انت کہ ایشی ءِ تہ ءَ مدام گیشی بوھگ ءَ انت۔ آب و ہوا ءِ بدلی ءَ چہ کشت ءُ کشاری ءُ خوراک ءِ ایمنی ءَ را ھم ھترہ ءِ دیم ءَ کیت۔ آیوکیں مالی سال ءِ تہ ءَ موسمیاتی کمک ءِ لیوی ءِ واستہ 51ارب کلدار ءِ ٹارگٹ ایر کنگ بوتگ۔ اے لیوی ءِ چیر دستی ءَ تاں انوگ ءَ رستگیں زرّانی بابت ءَ سرجمیں ھال ءُ اھوال دیگ بہ بنت۔ آئی ءَ گوشت کہ آئی ٹی ءِ واستہ بجٹ ءَ فنڈز ءِ شرح کم انت، ءُ ورنا آناں آئی ٹی ءِ وانگ ءُ زانگ ءِ واستہ فنڈز ءِ تہ ءَ گیشی ناگزیر انت۔ ناز بلوچ ءَ گوشت کہ بجلی ءِ نھاد ءِ گیش بوھگ ءِ سبب ءَ گریب ءُ تنگدست جیڑہانی آماچ اَنت، گرانیں ٹیرف ءَ ابید ھم سرکلر ڈیبٹ گیش بوھگ ءَ اِنت، ءُ مردم لوڈ شیڈنگ ءِ سبب ءَ پریشان اَنت۔ آئی ءَ بجٹ ءِ وھد ءَ پارلیمنٹ گس ءَ کار کنوکیں ملازم آناں ھاسیں اعزاز ءِ دیگ ءِ ھم سفارش کتگ۔