برطانیہ ءِ معاون دری کارانی وزیر ہمیش فالکنر ءَ وفاقی داخلہ ءِ وزیر محسن نقوی ءَ گوں گند ءُ نند کتگ، پاک برطانیہ ءِ سیادی ءُ دمگ ءِ سرجمیں جاور ھال ءِ بابت ءَ گپ ءُ تران

اسلام آباد۔17جون  (اے پی پی): برطانیہ ءِ نائب دری کارانی وزیر ہمیش فالکنر ءَ وفاقی وزیر داخلہ محسن نقوی ءَ گوں گند ءُ نند کتگ، ایشی ءِ تہا پاک برطانیہ ءِ سیادی ءُ خطہ ءِ سرجمیں جاور ھال آنی بابت ءَ گپ ءُ تران کتگ۔ وزارت داخلہ ءِ جارکش ءِ رد ءَ برطانیہ ءِ نائب دری کارانی سیکرٹری ءَ امریکہ ءُ ایران ءِ مفاہمت ءِ تہ ءَ پاکستان ءِ جوانیں ءُ فعالیں کرد ءِ ساڑات ءُ گوشت کہ پاکستان ءِ مزن وزیر شہباز شریف ءُ فیلڈ مارشل سید عاصم منیر ءَ امن ءِ واستہ راجدپتری کرد پیلو کتگ۔ ایران ءُ امریکہ ءِ صلح ءَ پاکستان ءَ جھان ءِ امن ءِ چیمپئن ءِ رنگ ءَ پیش داشتگ ۔ گند ءُ نند ءَ دوئیں ملک آنی نیام ءَ ناشرکاری ءِ ھلاپ ءَ جنگ، ناجائزیں ہجرت ءِ ھلاپ ءَ جنگ، ادارگی کمک، ءُ پولیس ءِ تربیت ءَ ھوار جتا جتائیں پڑ آنی تہ ءَ کمک ءَ را گیش کنگ ءِ سر ءَ تپاک کنگ بوتگ۔ وزیر داخلہ محسن نقوی ءَ گوشت کہ اپ اسکیل پروجیکٹ ءِ جوانیں آسر دیم ءَ آیگ ءَ انت، ءُ پاکستانی ادارگ آنی گنجائش ءَ را سک باز گیشی بوتگ۔ پاکستان ناجائزیں ہجرت ءُ انسانی سوداگری ءِ حلاف ءَ بے دروریں گامگیج زورگ ءَ انت ۔ دوئیں وزیر آں جعلی نودربر ویزہ ءِ جیڈھ ءِ گیواری ءِ واستہ یکجائی ءَ کار کنگ ءِ سرا تپاک کتگ۔ تہی کارانی وزیر محسن نقوی ءَ گوشت کہ اوگانستان ءَ چہ بازیں ناشرکاریں گل سرگرم انت، اوگان سرکار ءَ پاکستان ءِ ھلاپ ءَ وتی مٹی ءِ کارمرد کنگ بند کنگی انت۔ وزیر داخلہ محسن نقوی ءَ پاک برطانیہ ءِ سیادی ءَ را گیش مھکم کنگ ءِ واستہ وتی جزم ءِ پدا زور دات۔ اے موہ ءِ سر ءَ وفاقی وزیر چوہدری سالک حسین، علی پرویز ملک، طلال چوہدری، عون چوہدری، سیکرٹری داخلہ محمد خرم آغا، برطانوی ہائی کمشنر جین میریٹ، ڈی جی ایف آئی اے، کمانڈنٹ این پی اے  ءُ  ڈی جی این سی سی آئی اے  ھم ھوار اتنت۔