اسلام آباد۔ 25اکتوبر (اے پی پی) قائم مقام صدر میاں رضا ربانی پولیس ٹریننگ سینٹر کوئٹہ ٹی دہشت گرد آتا جلہو نا ترندی اٹ مذمت ئِ کرسا پارے کہ دہشت گرد آک ہچ ئُ رعایت اسے نا حقدار افس و دہشت گرد آتا لغوری کارروائی تا برخلاف قوم متحد ئِ۔ سے شنبے آ داڑے جاری بیان اٹی اوپارے کہ آخریکو دہشت گرد نا چٹفنگ اسکان ملک دشمن دہشت گرد آتا برخلاف کارروائیک برجاسلرہ۔ قائم مقام صدر قومی سلامتی نا ادارہ غاتا دہشت گردی نا برخلاف سرسہبی تا ستائِ کرسا پارے کہ دہشت گرد آتا برخلاف سخت ترین کارروائیک بایدے برجاسلر۔ قوم قومی سلامتی ناادارہ غاتا افسر و کارندہ غاتا قربانی تے وخت اس ہم است آن دننگ کپک۔ اوصوبائی حکومت ئِ ٹھپی مروک آ بندغ آتے گچین درمان نا آسراتی نا فراوانی نا پارت کرے و زیر تربیت شہید پولیس کارندہ غاتا خاہوت آتون ہڑزخواہی نا درشانی ئِ کرے۔ او ٹھپی مروک آتا زوت جان جوڑی کن دعا ہم کرے۔
