اسلام آباد ۔ 24 اکتوبر (اے پی پی) مزن وزیرمحمد نواز شریف ئَ پاکستان ئِ اقتصادی ئُُ معاشی براجائی ئِ ھاترا میاں اوستمانی مالیاتی فنڈ (آئی ایم ایف) ئِ کمک آناں ساڑاتئُُ گوشت کہ حکومت ئَ جوانیں ایجنڈگ آنی سبب ئَ اقتصادی سوبمندی در جتگ۔ وھدیکہ آئی ایم ایف ئِ میینجنگ ڈائریکٹر کرسٹین لاگارڈ ئَ مزن وزیر ئَ را آئی ایم ایف ئِ پروگرام آنی تہ ئَ کامیاتی ئِ سر ئَ مبارکی دیان ئَ گوشت کہ اے ملک ئَ چہ دیمروئی ساپیں رنگے ئَ گندگ بوھگ ئَ اِنت۔ آئی ئَ اے ھیالانی درشانی دوشمبے ئِ روچ ئَ گند ئُُ نند ئِ ساھت ئَ تران کنان ئَ درشان کُت اَنت۔ مزن وزیر گس ئِ نیمگ ئَ چہ جاڑی بوتگیں ھال آنی رد ئَ کرسٹین لا گارڈ ئَ آئی ایم ایف ئِ پروگرام ئِ کامیاتی ئَ گوں سرجمی ئِ ھوالگ دیان ئَ گوشت کہ اے سپرے تہ ئَ ٹوھیں گام اِت۔ شما دو سالے لُکیں ساھت ئِ تہئَ مزنیں ئُُ جوانیں اقتصادی پوزیشن در جتگ۔ کرسٹین لا گارڈ کہ پاکستان ئَ اولی سرکاری تر ئُُ تاب ئَ اِنت۔ آئی ئَ گوشت کہ آ اِدا اتکگ گڈا سک باز شات ئُُ گل بوتگ۔ آئی ئَ مزن وزیر ئِ گامگیج آنا سک باز ساڑاتگ۔ منیجنگ ڈائریکٹر ئَ گوشت کہ پاکستان ئِ اقتصادی دیمروئی روچ پہ روچ دیم ئَ جُنزان اِنت۔ مالیاتی کمیگ کم کم ئَ سرجم بوھگ ئَ اَنت۔ بُنیاتی کوکا مھکم ئُُ ٹیکس پالیشی ئُُ انتظامی تک توسیپی بوھگ ئَ اَنت۔ ما ملک ئَ را ناشرکاری ئِ ھوپ ئَ چہ رکھینگ ئِ جُہد ئَ اَنت ئُُ مئے جُہد کامیات بوھگ ئَ اَنت۔ استیں وھد ئَ 2لکھ اُرد گوریچانی دمگ ئَ ناشرکاری ئِ ھلاپ ئَ جنگ کنگ ئَ اَنت۔ مزن وزیرئَ گوشت کہ ناشرکاری ئِ ھلاپ ئَ جنگ ئَ 24ھزار گان بہائیں نپس ھمے وڑال آں شُتگ۔ 50ھزار ئِ مردم ٹپیگ بوتگ وھدیکہ معشیت ئِ 100ارب ڈالر ئِ تاوان رستگ۔ آئی ئَ گوشت کہ جاور آل جوان اَنت پدا ھم سلاھ بندیں اُرد ملک ئَ ناشرکاری ئِ پشمندئیں ٹھکانہ آں پروشگ ئَ اِنت۔ پاکستان ئُُ اوگانستان ئِ ھوالگ ئَ مزن وزیر ئَ گوشت ئَ اوگانستان ئِ پڑ ئَ ایمنی المی اِنت، آھودا جاور گر ئُُ دار ئُُ کبس ئَ بوھگ ھمے ھاترا المی اِنت کہ پاکستان ئِ دارجین سیم سر گوں اوگانستان ئَ ھوار اَنت آھودئِ جاور چہ آھود ئِ انتظامی ئِ دست ئَ در بیا اَنت گڈا ناشرکاری آنی زور کمو گشتر بیت، بلئے ما وتی سیم سر ئَ تُرندی سیکورٹی تالان کتگ۔ مزن وزیر ئَ گوشت کہ آئی ئِ حکومت ئَ انتظامی کار آناں جھلی تک ئَ آرگ ئِ مول ئُُ مراد ھمے بوتگ کہ اُلس ئَ را زوتاں چہ زوت آسراتی پُجارینگ ئُُ جیڈھ آنی گیواری بہ بیت۔ مزن وزیر ئَ گوشت کہ اَستیں حکومت ئَ پن، اشکر، ایل این چی ئِ شوبگ ئَ ھاٹیگ ئِ منصوبگ ئِ سر ئَ کار کنگ ئَ اِنت ئُُ 2018ئَ تاں ملک ئَ توان ئِ کمیگ ئَ را ھلاس کنگ بیت۔ آئی ئَ گوشت کہ صنعتی پڑ ئَ اِچ لوڈشیڈنگ کنگ نہ بوھگ ئَ اِنتئُُ مئے دلگوش سستائیں تون جوڑ کنگ ئِ نیمگ ئَ اِنت۔ آئی ئَ گوشت کہ ما چاگرد ئِ بزگر ئُُ ھمزوریں مردم آناں آسراتی ئُُ ایمنی پجارینگ ئِ ھاترا دل یکیم اَنت ئُُ ایشی ئِ ھاترا حکومت ئَ گوستگیں سئے سال آنی تہ ئَ بے نظیر انکم سپورٹ پروگرام ئِ بجٹ ئَ را 40ارب کلدار ئَ چہ ودینتگ ئُُ 120ارب کلدار کتگ۔ آئی ئَ گوشت کہ اے پروگرام ئِ چیر دستی ئَ گریبیں ھاندان آنی کساس 3ملین ئَ چہ گیش کتگ ئُُ ایشرا 5.6 ملین کنگ بوتگ۔
