وزیراعظم مدینہ منورہ ٹی حج ڈائریکٹوریٹ اس جوڑ کننگ نا منظوری ئِ تس، اسلام آباد اٹی ساڑی آ حج ٹریننگ ڈائریکٹوریٹ ئِ شون ترسا ڈائریکٹوریٹ جنرل اس جوڑ کننگ، گچین حج بست و بند آتیا وزارت مذہبی امور و حج ڈائریکٹوریٹ نا ملازم آتے کن چار تو انا ودیکی پنداوڑی تننگ نا احکامات

اسلام آباد۔ 24اکتوبر (اے پی پی) وزیراعظم محمد نواز شریف آخبت اٹی حاجی تا آسراتی ئِ مون آ تخسا مدینہ منورہ ٹی حج ڈائریکٹوریٹ اس جوڑ کننگ نا منظوری ئِ تس وخت اس کہ اسلام آباد اٹی ساڑی آ حج ٹریننگ ڈائریکٹوریٹ ئِ شون ترسا ڈائریکٹوریٹ جنرل اس جوڑ کننگ نا حکم آتے ہم جاری کرینے۔ دوشنبے آ وزیراعظم محمد نواز شریف تون بنجائی وزیر مذہبی امور سردار محمد یوسف ، سیکرٹری مذہبی امور مرزا سہیل عامر و ڈی جی حج جدہ ساجدیوسفانی وزیراعظم ہاﺅس اٹی اوڑدہی کریر۔ ایوان وزیراعظم نا کنڈآن برجاءبیان نا رداٹ وزیراعظم گچین حج بست و بند آتیا بنجائی وزیر و وزارت مذہبی امور حج ڈائریکٹوریٹ نا غٹ ملازم آتا کوشست آتا ستائِ کرسا وزارت مذہبی امور و حج ڈائریکٹوریٹ نا غٹ ملازم آتے کن چار تو انا ودکی پنداوڑی تننگ نا ہم حکم آتے جاری کرے۔ وزیراعظم پارے کہ حاجی تا خذمت کننگ ہم اللہ تعالیٰ نا خوشنودی ئیِ دوئی کننگ نا ذریعہ ئِ و نم خوش قسمت اورے کہ اللہ نمے حاجی تا خذمت نا وارخواہی تس۔ وزیراعظم پارے کہ حج بست و بند آک تدوک آ سال انا مقابلہ ٹی بے کچ گچین و جوان وڑاٹ سرانجام تننگار۔ وزیراعظم اومیت ظاہر کرے کہ بروک آ سال حج بست و بند آک داسال آن ہم جوان مریرہ ہرا ایلو وزارت و ادارہ غاتے کن قابل تقلید مریرہ۔ او دا رداٹ سعودی حکومت نا پبی کمکاری آ منت واری ئِ ادا کرسا پارے کہ داہیت ستاکڑزک کہ حاجی تے ہنکینی، سفری و جان جوڑی نا گچین آسراتی فراوان کننگا۔