دوحہ۔ 24اکتوبر (اے پی پی) صدر مملکت ممنون حسین قطری شاہی و کاروباری شخصیت آتیا زورشاغا کہ او پاکستان نا سٹریٹجک محل و وقوع ، زرکاری نا وارخواہی، کاروباری دوست چاگڑد و وحکومت نا زرکاری نا حامل سود مند پالیسی تیان فائدہ ہرفسا ملک انا کیہی بشخ آتیٹی زرکار ی کیر۔ او داہیت ئِ دوشنبے آ قطر انا شاہی و کاروباری شخصیت آتا ڈل اتون ہیت وگپ کرسا پارے ہراک قطری بزنس ایسوسی ایشن نا چیئرمین شیخ فیصل بن قاسم الثانی نا سروکی ٹی اوڑتون داڑے اوڑدہی کریر۔ صدر مملکت ممنون حسین ہرا امیر قطر نا سلہ غا چاردے ئی دورہ غاٹی ئِ ، ڈل ئِ پارے کہ زرکاری دوست ضابطہ و ڈیہہ ٹی بڑزانگا کچ کٹیا تون پاکستان درملکی زرکار آتے کن وارخواہی نا گل زمین اس تکک۔ اوتوانائی، بنداوی ڈھانچہ ، تعلیم و کشت و کشار خاص کر کارپوریٹ فارمنگ، حلال فوڈ و ڈیری فارمنگ نا بشخ آتیٹی زرکاری آ زورشاغا۔ اوپارے کہ قطر انا زرکارآک ”فیفا2022ءورلڈ کپ“ نا میزبانی نا تیاری تا چرجوئی ٹی دوحہ ٹی جوڑجاڑی سرجزوآتا پیش نظر سیمنٹ نا ودوک آ طلب ئِ پورو کننگ کن سیمنٹ نا تیاری تون اوار کیہی بشخ آتیٹی سرکاری و نجی کہول آتیا پاکستان اٹی اسیجائی ڈٹ آتا بنائِ کننگ کیک۔ او پارے کہ پاکستان اٹی گچین حکمرانی نا سوب زرکارآتا پت بحال مسنے ۔ بین الاقوامی مالیاتی ادارہ اقتصادی و مالیاتی بشخ آتیٹی پاکستان نا سرسہبی تا اعتراف ئِ کننگ ئُ۔ صدر ممنون حسین پارے کہ پاک چین اقتصادی راہداری نا شون و شان ڈٹ ہم پوسکنو کسر ملک و واپار و معیشت نا کیہی بشخ آتیٹی زرکارآتے کن کاروباری وارخواہی پیش کیک۔ اودا یخین نا درشانی ئِ کرے کہ پاکستان جوان انگا دوتے اٹ ئِ۔ اونا آخبت روشنائِ و اقتصادی کارکڑد و کاروباری وارخواہی تا بنداو آ دا 2050ءاسکان اسہ شون ہلوک قوم اسے نا وڑاٹ مون آ بریک۔ اوشاہی کاروباری شخصیت آتے پارے کہ سی پیک نا رداٹ جوہری ، کولا، شمسی و پن بجلی تون اوار توانائی نا کیہی ڈٹ اڈتننگانے۔ سی پیک آن نہ صرف پاکستان و چین بلکن دے ٹکی نیامی و نیامی ایشیائی ریاست آتون اوار مچ آ ڈیہہ ئِ فائدہ مریک۔ اوپارے کہ نیامی ایشیائی ریاست آک راہداری تون اوار مننگ نا خواہندار ئُ ہرا پاک چین سیم آ خنجراب ئِ بحیرہ ءعرب اٹی گوادر تون ملفک۔ شیخ فیصل بن قاسم الثانی پارے کہ قطر و پاکستان نا نیام اٹ تعلقداری تا روتہ غاک اسیجائی عقیدہ، دودوربیدہ و تاریخ اٹی پیوندئُ۔ اوپاکستان تون کاروباری رابطہ غاتیٹی ودکی ٹی زیات است خواہی ہلسا پارے کہ او پاکستان اٹی اسیجائی ڈٹ و کاروباری وارخواہی پٹنگ کن تینا بزنس ایسوسی ایشن اٹی سٹیئرنگ کمیٹی اس جوڑ کیرہ۔ شیخ فیصل پارے کہ اوپاکستان و قطر انا نیام اٹ فعال کاروباری رابطہ و کمکاری کن ٹھوس وڑوڈول اس وضع کننگ خواہک۔ پاکستانی کمامدار آتے دا رداٹ قطری زرکارآتے کن زرکاری نا بشخ آتا پیدواری کرسا ایسوسی ایشن ئِ تینا ٹھوس سلاہ غاتے پیش کروئی مرے۔ صدر ڈل ئِ تینا پبی کمکاری نا باوری ترفسوا پارے کہ او زرکاری بورڈ ئِ ٹھوس کاروباری ڈٹ وضع کننگ و دارداٹ قطری بزنس ایسوسی ایشن تون رابطہ و صلابت کن دوحہ نا دورہ کننگ نا ہم پارت کیک۔
