ہڑتوم آ ٹیم تا نیام اٹ سیریز 1-1آن بریبر
برمنگھم ۔ 01اگست(اے پی پی) انگلینڈ و پاکستان نا کرکٹ ٹیم تا نیام اٹ چارٹیسٹ میچ آتیا تالان سیریزنا مسٹ میکو میچ (پگہ) چارشنبے آن برمنگھم اٹی بناءکیک۔ ہڑتوم آ ٹیم تا نیام اٹ جاری سیریز 1-1اٹ بریبر ئِ۔ پاکستان ٹیم میزبان ٹیم ئِ اولیکو ٹیسٹ میچ اٹی 75رنزاٹ شکست تسوسس وخت اس کہ انگلینڈ ٹیم ارٹ میکو ٹیسٹ اٹی کم بیک کرسا پاکستان ئِ 330 رنزاٹ شکست ترسا سیریز 1-1آن بریبر کریسس۔ ہڑتوم آ ٹیم تا نیام اٹ سیریز نا چارمیکو و آخریکو کرکٹ ٹیسٹ میچ 11اگست آ اوول اٹی گوازی کننگک۔ ٹیسٹ میچ آتا سیریز آن گڈ ہڑتوم آ ٹیم تا نیام اٹ پنچ ون ڈے میچ آتا سیریز نا اولیکو میچ 24اگست آ ساﺅتھمپٹن اٹی گوازی کننگک، ارٹ میکو ون ڈے میچ 27اگست آ لارڈز اٹی گوازی کننگک ، مسٹ میکو ون ڈے میچ 30اگست آ نوٹنگھم اٹی گوازی کننگک، چارمیکو ون ڈے میچ یکم ستمبر آ ہیڈ نگلے ٹی گوازی کننگک و پنچ میکو و آخریکو ون ڈے میچ 4ستمبر آ کارڈف اٹی گوازی کننگک۔ سیریز نا اسٹ انگا ٹی ٹونٹی میچ 7ستمبر آ مانچسٹر اٹی گوازی کننگک۔ قومی کرکٹ ٹیم دورہ نا وخت آ آئر لینڈ نا برخلاف ہم اِرا ون دے میچ گوازی کیک، اولیکو ون ڈے میچ 18اگست آ گوازی کننگک۔ آئر لینڈ نا برخلاف ڈبلن اٹی ہی ارٹ میکو ون ڈے میچ 20 اگست آ گوازی کننگک۔
