پاکستان مسلم لیگ (ن) ملک اٹ جمہوریت نا سوگوی ، پارلیمان نا بالادستی و آئین نا حکمرانی کن جہد کننگ ءِ،پرائم منسٹر یوتھ پروگرام نا فوکل پرسن و مسلم لیگ (ن) نا مرکزی سینئر راہشون چوہدری نعیم کریم

کوئٹہ۔ 16 ستمبر (اے پی پی) پرائم منسٹر یوتھ پروگرام نا فوکل پرسن و مسلم لیگ (ن) نا مرکزی سینئر راہشون چوہدری نعیم کریم پارینے کہ پاکستان مسلم لیگ (ن) ملک اٹ جمہوریت نا سوگوی ، پارلیمان نا بالادستی و آئین نا حکمرانی کن جہد کننگ ءِ، جمہوری نظام اٹ اختلاف رائے نا شرف و سیاسی مکالمہ بنداوی اہمیت تخک، جمہوریت نا اصل مسخت الس ءِ واکدار جوڑ کننگ و اوفتا ویل آتے آئینی وڑ اٹ ایسر کننگ ءِ، سیاسی جماعت آتے جندی اختلاف آتیان ایڑترمرسا ملک انا شونداری و پارلیمنٹ نا بالادستی کن تینا کڑد ءِ ادا کروئی مریک ۔ جمہوریت نا جہانی دے انا وخت آ مسلم لیگ (ن) بلوچستان نا رابطہ آفس آن جاری مروک آ اسہ بیان اسے ٹی چوہدری نعیم کریم پارے کہ جمہوریت الس نا سلاہ ، بنداوی حق و بریبرنا وارخواہی تا شرف نا پن ءِ، جمہوری راج انا سوگوی کن آئین، کانود و ادارہ غاتا شرف المی ءِ، جمہوریت نا اصل طاقت الس نا شمولیت و اوفتا پت اٹی ءِ، ہر شاری ءِ تینا رائے نا درشانی و قومی باندات آتیٹی پبی بشخ ہلنگ نا حق دوئی ءِ، اختلاف رائے نا شرف و مکالمہ نا کمک اٹ ویل آتا ایسر اس پٹنگ جمہوریت نا بنداوی روح ءِ۔ او پارے کہ پاکستان نا شونداری و شادکامی کن جمہوری ادارہ غاتے سوگو کننگ، آئین نا بالادستی ءِ پک کننگ و السی حق آتا رکھ ءِ کننگ ننا غٹ انا اسیجائی زمواری ءِ، سیاسی جماعت آتے ہم بایدے مرے کہ او جندی اختلاف آتیان ایڑترمرسا ملک انا شونداری و شادکامی و الس نا ویل آتا ایسر کننگ کن حکومت تون تفر۔