مزن وزیر شہباز شریف کرغزستان ءِ بنجاھی شہر بشکیک ءَ سر بوتگ

بشکیک۔31اگست  (اے پی پی): مزن وزیر محمد شہباز شریف کرغزستان ءِ سئے روچی تر ءُ تاب ءَ بشکیک ءَ شتگ۔ دو شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر شنگھائی کمکی گل ءِ سروکیں دیوان ءَ بھر زوری کنت۔ بشکیک ءَ سر بوھگ ءَ پد کرغزستان ءِ کابینہ ءِ چیئرمین عادلبک قسیمالیف ءَ مزن وزیر محمد شہباز شریف ءَ را وش آتک کت۔ مزن وزیر محمد شہباز شریف شنگھائی کوآپریشن آرگنائزیشن ءِ سروک دیوان ءَ گشتانک دنت ءُ دمگی ءُ جھان ءِ جیڈھ آنی سر ءَ پاکستان ءِ موقف پیش کنت۔ ایس سی او پلس سروک دیوان ءَ مزن وزیر محمد شہباز شریف ھم بھر زوری کنت۔ مزن وزیر ھاسیں مہمان ءِ بستار ءَ ورلڈ نوماڈ گیمز ءِ بنگیجی مراگش ءَ ھم بھر زوری کنت۔ تر ءُ تاب ءِ ساھت ءَ مزن وزیر محمد شہباز شریف شنگھائی کوآپریشن آرگنائزیشن ءِ دیوان ءَ بھر زوروکیں جتاجتائیں ملک آنی سروک آنی گوما ھم دو نیمگی گند ءُ نند کنت ۔ گند ءُ نند آنی تہ ءَ وت مہ وتی سیادی، تجارت ءُ سرمایہ کاری، دمگی کمک ءُ وت مہ وتی ھب ءُ واھگ ءِ اے دگہ معاملہ آنی سر ءَ گپ ءُ تران کنگ بیت۔ مزن وزیر محمد شہباز شریف گوں کرغزستان ءِ صدر صدر ژاپاروف ءَ دو نیمگی گند ءُ نند ءَ کنت۔ گند ءُ نند ءَ پاکستان ءُ کرغزستان ءِ نیام ءَ دو نیمگی سیادی آنی درستیں تک ءُ پھنات آنی سر ءَ چار ءُ تپاسی کنگ بیت۔ مزن وزیر ءِ کرغزستان ءِ تر ءُ تاب ءِ ساھت ءَ تجارت ءُ سرمایہ کاری، توان، دمگی سیادی، وانگ ءُ زانگ، سیل ءُ سواد ءُ مردم ءِ نیام ءَ رابطہ ءِ دیمروئی ءِ ھوالگ ءَ گپ ءُ تران کنگ بیت۔ نائب مزن وزیر ءُ دری کارانی وزیر محمد اسحاق ڈار ءُ وفاقی وزیر جام کمال خان، علیم خان ءُ عطا اللہ ترار پاکستانی ڈل ءِ بہر انت۔