مزن وزیر محمد شہباز شریف 31 اگست ءَ بگر داں 2 ستمبر ءَ کرغزستان ءِ 3 روچی سرکاری تر ءُ تاب ءَ کنت

اسلام آباد۔31اگست  (اے پی پی): مزن وزیر محمد شہباز شریف کرغزستان ءِ صدر صادر نورگوزان ژاپاروف ءِ دعوت ءِ رد ءَ 31اگست ءَ بگر داں 2 ستمبر ءَ کرغزستان ءِ 10روچ ءِ سرکاری تر ءُ تاب ءَ کنت۔ جمعہ ءِ روچ ءَ وزارت ءِ درئی کار ءِ نیمگ ءَ جاڑی بوتگیں بیان ءِ رد ءَ تر ءُ تاب ءِ ساھت ءَ مزن وزیر محمد شہباز شریف شنگھائی کوآپریشن آرگنائزیشن ءِ سروک آنی کونسل ءِ دیوان ءَ بھر زوری کنت ءُ کرغزستان ءِ گوما دو نیمگی گند ءُ نند ءُ ایندگر ھاسیں کار آنی ھم برجم دار ایت۔ مزن وزیر ءِ ھمراھی ءَ نائب مزن وزیر ءُ دری کارانی وزیر محمد اسحاق ڈار، وزیر ءِ تجارت جام کمال خان، وزیر ءِ  رسانک  عبدالعلیم خان، وزیر ءِ اھوالکاری ءُ نشریات عطا اللہ تارڑ ءُ مزنیں سرکاری کارندہ ھوار بنت۔ بشکیک ءَ وتی نندگ ءِ ساھت ءَ مزن وزیر شنگھائی کوآپریشن آرگنائزیشن ءِ کونسل ءِ سروک آنی دیوان ءُ ایس سی او پلس سروک دیوان ءَ بھر زوری کنت۔ مزن وزیر 2026-27ءِ واستہ ایس سی او ءِ کونسل آف ہیڈز اسٹیٹ ءِ پاکستان ءِ چیئرمین شپ ءِ ذمہ واری ھم زوریت۔ ایس سی او ءِ گند ءُ نند آنی موہ ءَ مزن وزیر ءَ بہر زوروکیں ملک آنی سروک آنی گوما دو نیمگی گند ءُ نند ھم کنت۔ مزن وزیر 31اگست ءَ ورلڈ نومیڈ  گیمز ءِ بنگیج ءِ مراگش ءَ ھم بھر زوری کنت۔2ستمبر ءَ مزن وزیر محمد شہباز شریف ءِ گوما  صادر ژاپاروف  پاکستان ءُ کرغزستان ءِ سیادی ءِ توامیں تک ءُ پھنات آنی سر ءَ دو نیمگی گپ ءُ تران کنت۔ دوئیں نیمگ پاکستان ءُ کرغزستان ءِ نیام ءَ دو نیمگی سیادی آنی سر ءَ سرجمیں چار ءُ تپاسی کن اَنت ءُ دو نیمگی کمک ءَ را گیش دیمروئی دیگ ءِ راہ آنی سر ءَ ھیال ءُ لیکہ ءِ درشان کن اَنت، ھاسیں رنگ ءَ تجارت ءُ سرمایہ کاری، توانائی، دمگی یکوئی، وانگ ءُ زانگ، سیل ءُ سواد ءُ مردم آنی نیام ءَ رابطہ آنی پڑ ءَ کمک ءَ را گیش مھکم کنگ ءِ سر ءَ دلگوشی دیگ بیت۔ دوئیں رہشون دمگی ءُ کثیر جہتی فورم آنی تہ ءَ وت مہ وتی دلچسپی ءُ کمک ءِ دمگی ءُ جھان ءِ جیڈھ آنی سر ءَ ھم ھیال ءُ لیکہ ءِ درشان کن اَنت۔ پاکستان ءُ جمہوریہ کرغزستان ءِ نیام ءَ گرم ءُ برات ءِ سیادی است انت کہ ایشی ءِ بنیات ءَ یکجائی راجدپتر، مذہبی ءُ دود ءُ ربیدگ ءِ سیادی ءُ جنوبی ءُ میان استمانی ایشیا ءَ امن، یکوئی ءُ وشحالی ءِ یکجائی واھشت انت۔ مزن وزیر ءِ تر ءُ تاب ءَ چہ انوگیں مزن تک ءِ رابطہ آنی وسیلگ ءَ پیداکیں جوانیں رپک ءَ را گیش مھکم کنگ ءِ یک ھاسیں موہ رس ایت، استیں تپاوت ءَ را عملی ءُ موثر کمک ءِ تہ ءَ بدل کنگ ءُ پاکستان ءُ کرغزستان ءِ نیام ءَ دیریں شریکداری ءَ را گیش مھکم کنگ بیت۔