صدر ءَ کرغزستان ءِ ھمکار ءُ راج ءَ را آجوئی ءِ روچ ءِ مبارک بات داتگ

اسلام آباد۔31اگست  (اے پی پی): صدر آصف علی زرداری ءَ کرغزستان ءِ صدر صادِر ژاپاروف  ءُ کرغزستان ءِ براتیں اُلس ءَ را وتی آجوئی ءِ روچ ءِ دل ءِ جہلانکی ءَ چہ مبارکی درشان کتگ۔ دو شمبے ءِ روچ ءَ صدارتی ایوان ءِ پریس ونگ ءِ نیمگ ءَ جاڑی بوتگیں پریس ریلیز ءِ رد ءَ صدر ءِ مملکت ءَ وتی مبارکی نمدی ءِ تہ ءَ گوشت کہ پاکستان کرغزستان ءِ گوما وتی دوستی ءُ نزیکیں سیادی آناں سک باز ارزشت دنت کہ ایشی ءِ بنیات یکجائی راجدپتر، دود ءُ ربیدگی نزیکی، وت مہ وتی بھروسہ ءُ کمک ءِ سر ءَ اِنت۔ صدر ءِ مملکت آصف علی زرداری ءَ جولائی ءَ کرغزستان ءِ تر ءُ تاب ءِ حوالہ ءَ گوشت کہ اے تر ءُ تاب ءَ چہ 1995 ءَ کرغزستان ءِ اولی تر ءُ تاب ءِ وشیں یات اتک انت ءُ دوئیں ملک آنی نیام ءَ دو نیمگی سیادی آناں گیش مھکم کنگ ءِ واستہ یک دگہ موہ ءِ پجاری بوت۔ آئی ءَ دسمبر 2025 ءَ صدر صادِر ژاپاروف  ءِ پاکستان ءِ تر ءُ تاب ءِ وشیں ساھت آناں ھم یات کت۔صدر ءَ گوشت کہ دوئیں موہ آنی سر ءَ برجم داشتگیں پائدگ مندیں گپ ءُ تران ءَ یک رندے پدا پاکستان ءُ کرغزستان ءِ یکجائی جزم ءِ پدر کنگ بوتگ کہ آ وت مہ وتی مفاد ءِ شوبگ آنی تہ ءَ کمک ءَ را گیش بہ کن اَنت۔ صدر ءِ مملکت ءَ دوئیں ملک آنی وت مہ وتی نپ آنی تہ ءَ یکوئی ءَ را گیش مھکم کنگ ءِ واستہ صدر صدر جاپاروف ءِ گوما نزیکیں سیادی ءَ را برجاہ دارگ ءِ واھشت ءِ درشان کت۔ صدر ءَ صدر صدر جاپاروف ءِ جان سلامتی ءُ وشھالی ءِ واستہ ءُ کرغزستان ءِ براتیں راج ءِ واستہ امن ءُ ایمنی ءِ برجاہ دارگ ءِ واستہ وتی نیکیں واھگ آنی درشان ھم کتگ۔