معیشت سرکاری ءُ نجی شعبہ ءِ نیام ءَ مھکمیں شریکداری ءِ گوما پائیداریں راہ آنی سر ءَ دیم ءَ شُت کنت،  وزیر ءِ ھزانگ

اسلام آباد۔31اگست  (اے پی پی): وفاقی وزیر برائے مالیات ءُ آمدنی سینیٹر  محمد اورنگزیب ءَ گوشت کہ ملک استحکام ءَ چہ دیمروئی ءِ نیمگ ءَ روگ ءَ اِنت، برآمدات ءِ سروکی ءَ دیمروئی ءِ واستہ گامگیج کنگ بوھگ ءَ اِنت، حکومت وتی مالیاتی گنجائش ءِ رد ءَ برآمداتی سروکی ءَ دیمروئی ءَ را دیم ءَ برگ ءِ واستہ وتی کرد ءَ پیلو کنگ ءَ اِنت۔ ایکسیم بینک ءِ نیمگ ءَ ھاسیں مہمان ءِ بستار ءَ ادا برجم داشتگیں مراگش ءَ گوں تران کنان ءَ وزیر ءِ ھزانگ ءَ گوشت کہ اقتصادی دیمروئی ءِ تہ ءَ نجی شوبگ ءِ ھوار بوھگ المی اِنت، معیشت سرکاری ءُ نجی شوبگ آنی نیام ءَ مھکمیں شریکداری ءِ گوما پائیداریں راہ آنی سر ءَ دیم ءَ شُت کنت، اقتصادی کاروائی آنی عمل کاروباری سرمایہ کاری ءِ دیمروئی ءَ گوں بندوک اِنت۔ اقتصادی استحکام ءِ گوما۔ وزیر ءِ ھزانگ ءَ گوشت کہ اے وھد ءَ ملک استحکام ءَ چہ ترقی ءِ نیمگ ءَ روگ ءَ انت۔ لہتیں سال پیسر مئے معیشت سک بوتگ ات بلے کم کم ءَ وش بوہگ ءِ عمل برجاہ انت۔ گوستگیں سال ءَ اقتصادی دیمروئی ءِ شرح 3.7 درسد بوتگ ءُ اے سال ءَ اے شرح گیش بوھگ ءِ گمان انت۔ وزیر ءِ ھزانگ ءَ گوشت کہ میاں اوستمانی تک ءَ انوگیں بحران ءِ سبب ءَ مہنگائی ءُ سرجمیں راجی بجٹ ءِ سر ءَ اثر بوتگ، پاکستان اے جیڈھ ءِ گیواری ءَ وتی کرد ءَ پیلو کنگ ءَ انت۔ آئی ءَ گوشت کہ گوستگیں وھد ءَ ردوم ءِ چکر ءِ سبب ءَ بیلنس آف پیمنٹس ءِ جیڈھ پیداک بوتگ اَنت۔ مئے کوشست برآمدات ءِ سروکی ءَ دیمروئی ءِ سر ءَ دلگوشی دیگ ءُ پائیدار بنیات آنی سر ءَ ایشی ءَ را برجاہ دارگ اِنت۔ اے وھد ءَ مالیاتی خسارہ 22سال ءِ تہ ءَ وتی کم ترین کچ ءَ اِنت۔ پرائمری بیلنس ھم شرتر اِنت۔ گوستگیں سال ءَ کرنٹ اکاؤنٹ سرپلس بوتگ۔ وزیر ءِ ھزانگ ءَ گوشت کہ مئے واستہ نہ ایوک ءَ دیمروئی ءِ گوما بلکینگ ءَ دیمروئی ءَ را بنیات ءِ رنگ ءَ دیم ءَ روگ یک چیلنج اِنت، ایشی ءِ واستہ ما برآمد ءِ سروکی ءَ دیمروئی ءِ پالیشی ءَ را نجی شوبگ ءِ دست ءَ چہ سر ءَ عمل کنگ ءَ ایں ۔ مئے کرد یک حکومت ءِ بستار ءَ یک متوازن ءُ موزوں ماحولیاتی نظام ءِ پجارینگ اِنت۔ حکومت وتی مالی گنجائش ءِ رد ءَ برآمدات ءِ سروکی ءَ دیمروئی ءَ را دیم ءَ برگ ءِ واستہ وتی کرد ءَ پیلو کنگ ءَ اِنت۔ گوستگیں ءُ رواں مالی سال ءِ بجٹ آنی تہ ءَ اے درگت ءَ بازیں گامگیج چست کنگ بوتگ۔ سپر ٹیکس ءِ ھلاس کنگ ءِ کار کنگ بوتگ، ایڈوانس ٹیکس ءِ تہ ءَ ھم آسراتی داتگ، توانائی ءِ نرخ آناں مقابلہ ءِ ھاترا گامگیج زورگ بوھگ ءَ اِنت۔ وزیر خزانہ ءَ گوشت کہ مسابقتی قیمت آنی واستہ مئے کوشست برجاہ انت، اگاں چہ میاں اوستمانی بحران ءَ چہ معیشت ءَ را تاوان رستگ ءُ مہنگائی ءِ شرح ءَ را گیش کتگ، بلے ایشی ءِ باوجود حکومت جاور ھال آناں گہتر کنگ ءِ واستہ گامگیج کنگ ءَ انت۔ برآمد کنوک آناں 4.5درسد ءِ شرح ءَ مالی کمک پجاری کنگ بوھگ ءَ انت۔ اے درگت ءَ ایگزیم بینک آف پاکستان ءِ کرد المی انت۔ حکومت برآمداتی ری فنانسنگ ءِ واستہ گامگیج کنگ ءَ انت۔ ایل ٹی ایف ایف ءِ سرا عمل کنگ بوتگ۔ مئے کوشست انت کہ برآمداتی بنجاہ ءَ را پراھ ءُ شاھگان کنگ بہ بیت۔ وزیر خزانہ ءَ گوشت کہ برآمدات ءِ دیمروئی ءِ تہ ءَ کسانیں ءُ میاں اوستمانی کاروبار آنی ارزشت ءَ را انکار کنگ نہ بیت ءُ حکومت اے گپ ءِ کوشست ءَ کنگ ءَ اِنت کہ کسانیں برآمد کنوک آناں سبسڈی ءِ وسیلگ ءَ مالی کمک ءِ پھجارینگ ممکن بہ بیت۔