ڈاکٹر غلام علی ملاح آئی بی سی سی کراچی ءِ کارگس ءِ تر ءُ تاب

کراچی ۔31اگست  (اے پی پی): انٹر بورڈز کوآرڈینیشن کمشنر ءِ ایگزیکٹو ڈائریکٹر ڈاکٹر غلام علی ملاح ءَ آئی بی سی سی ءِ کراچی ءِ دمگی کارگس ءِ تر ءُ تاب کتگ۔ اے موہ ءِ سر ءَ آئی بی سی سی ءِ ڈائریکٹر جنرل عثمان خان ھم آئی ءِ ھمبراھی ءَ ات۔ ڈاکٹر ملاح  ءَ افسر ءُ کارندہ آں گوں گند ءُ نند کتگ ءُ نودربر ءُ الس ءَ را شریں آسراتی پجارینگ ءِ ھاترا آھانی محنت، پیشہ وارانہ پنت ءُ شون ءُ عزم ءِ ساڑاتگ۔ کراچی ءِ کارگس ءَ سر بوھگ ءَ اعجاز احسن ءُ آئی ءِ ٹیم ءَ ایگزیکٹو ڈائریکٹر ءَ را وش اتک کت۔ اے موہ ءِ سر ءَ افسر ءُ کارندہ آں حکومت ءِ پاکستان ءِ نیمگ ءَ میڈل آف میرٹ ءِ داد ءِ جار ءِ سر ءَ ڈاکٹر غلام علی ملاح ءَ را مبارکی دات ۔ ڈاکٹر ملاح  ءَ ٹیم ءِ مھر ءُ نیکیں واھگ آنی منت گپت ءُ گوشت کہ اے راجی داد یک مردمے ءِ کوشست آنی آسر نہ اِنت بلکیں سرجمیں آئی بی سی سی ٹیم ءِ یکجائی کوشست، محنت ءُ وفاقی وانگ ءُ زانگ ءُ پیشہ وارانہ تربیت ءِ وزارت ءِ برجاھیں سرپرستی، رہشونی ءُ بھروسہ ءِ آسر اِنت۔ آئی بی سی سی ءِ نیمگ ءَ چہ ڈیجیٹلائزیشن، السی آسراتی، سروسز ءِ گہتری ءُ چکاس ءُ جائزہ ءِ نظام ءِ تہ ءَ اصلاحات ءِ رد ءَ کتگیں گامگیج ایوک ءَ ادارگ ءِ افسر ءُ کارندہ آنی یکجائی کوشست ءِ سبب ءَ ممکن بوتگ اَنت۔ ڈاکٹر ملا ءَ کراچی ءِ کارگس ءِ ٹیم ءَ را زور پر دات کہ آ ھمے شوق، ایمانداری ءُ پیشہ وارانہ لگن ءَ گوں نودربر ءُ الس ءِ ھزمت ءَ برجاہ بہ دار اَنت۔ آئی ءَ گوشت کہ آئی بی سی سی ءِ اصل مھکم وتی ٹیم ءُ الس ءَ را موثر،  سا پ ءُ سلہ  ءُ وھد ءِ سر ءَ ازمت آنی پجاری ءِ جزم اِنت۔