نائب وزیرِ اعظم اسحاق ڈار نا بحیرۂ احمر اٹ واپاری جہاز آ جلہو آ گڑتی نا درشان

اسلام آباد۔ 12 اگست (اے پی پی)نائب وزیرِ اعظم و وزیرِ خارجہ سینیٹر محمد اسحاق ڈار بحیرۂ احمر اٹ واپاری جہاز آ مروک آ جلہو آ گڑتی نا درشانی ءِ کرینے۔ راجی رابطہ نا پلیٹ فارم ایکس آ چارشنبے نادے آجاری بیان نا رداٹ نائب وزیرِ اعظم پارے کہ "کنے بحیرۂ احمر اٹ اسہ واپاری جہاز اسے آ جلہو نا افسوزناک واقعہ نا حوال آ گڑتی ءِ ۔او پارے کہ داتم اسکان دوئی حوال آتا رداٹ دا واقعہ ٹی مسہ پاکستانی شاری شہید و اسٹ اس ٹھپی مسنے۔ او پارے کہ نن پدسلوک آخاہوت آتون ہڑزخواہی نا درشانی ءِ کینہ۔ نائب وزیرِ اعظم پارے کہ پاکستان اسہ غیر جنگی واپاری جہاز آ حوثی تا جلہو نا سخت مذمت ءِ کیک، دا وڑنا جلہو آک بے گناہ انسانی جان تے خطرہ ٹی شاغک ، جہانی کانود نا خلاف ورزی و بحیرۂ احمر اٹ جہاز رانی نا آجوئی، بحری سلامتی و واپاری جہاز رانی نا رکھ اکن بھلو خطرہ اسے۔ نائب وزیرِ اعظم و وزیرِ خارجہ سینیٹر محمد اسحاق ڈار پارے کہ نن واقعہ نا پین حوال و اونا پد اٹ مروک آ حالیت آتے معلوم کننگ کن تعلقدار سعودی کمامدار و یمن نا جہانی کہول آ امنامروک آ حکومت تون رابطہ ٹی اُن۔ نائب وزیرِ اعظم پارے کہ "ای ریاض اٹ پاکستانی سفارت خانہ ءِ پارت کرینٹ کہ او زوت تعلقدار کمامدارآتون رابطہ کے و شہید مروک آ پاکستانی شاری تا جنازہ غاتا وطن آ پدی اتنگ کن غٹ المی گام گیج آتے گچین وڑ اٹ مون آ دے ، وخت اس کہ ٹھپی مروک آ پاکستانی شاری تے ہر ممکن کمک فراوان کننگ کن ہم گام گیج کننگے۔” او پارے کہ نن حالیت آتیا سخت نظر تخانن و تعلقدار کمامدار آتون پدریسہ خڑکی رابطہ ٹی مرینہ ۔