وزیر ڈٹ بندی، شونداری و خصوصی گام گیج تون چینی کمیونسٹ پارٹی نا ڈل اتون اوڑدہی

اسلام آباد۔ 12 اگست (اے پی پی)بنجائی وزیر ڈٹ بندی، شونداری و خصوصی گام گیج پروفیسر احسن اقبال تون چینی کمیونسٹ پارٹی نا ڈل اوڑدہی کرے ، ہراٹی پاک-چین ہڑتوم آ کنڈآتا تعلقداری ، سیاسی و جماعتی رابطہ ، سی پیک 2.0 و ہڑتوم آ ملک آتا نیام اٹ شونداری کمکاری ءِ پین ودفنگ نا بابت گپ وتران کننگا۔ اوڑدہی نا وخت آ بنجائی وزیر پارے کہ پاکستان و چین نا سنگتی ہڑتوم آ کنڈآتا پت، سیاسی امنائی سلاہ و ہر مشکل وخت اٹ اسہ ایلو نا کمک آ تالان ءِ۔ او پارے کہ 2013 ٹی ہراتم پاکستانی زرکارآک پاکستان اٹ زرکاری کننگ آن ہچکچاہٹ نا گواچی ئسر، ہمو وخت آ چین پاکستان اٹ زرکاری کننگ نا فیصلہ کرے ہرا ہڑتوم آ ملک آتا نیام اٹ سوگو پت انا درشانی ءِ۔پروفیسر احسن اقبال پارے کہ سی پیک نا سرسہبی پاکستان و چین نا سروک آتا سوگو سیاسی ارادہ و پکا ارادہ نا نتیجہ ءِ۔ او پارے کہ پاکستان چینی کمیونسٹ پارٹی نا تنظیم، سرکڑدہ ، حکمرانی نا وڑ و مریس مدّی ڈٹ بندی نا آزموندہ غاتیان ہیل کننگ اٹ بھاز است خواہی تخک۔ بنجائی وزیر پارے کہ پاکستان و چین نا نیام اٹ پنچ سیاسی راہداری تا رداٹ منظم کمکاری ءِ مون آ دننگ خوانہ ہرا سی پیک 2.0 کن سیاسی و ادارہ جاتی بنداو اس فراوان کننگ کیک ۔ او پارے کہ جماعتی رابطہ ، پالیسی تبادلہ و ورنا سروک آتا نیام اٹ رابطہ غاتے پین سوگو کننگ نا گرج ءِ۔او چینی ورنا سیاسی سرکڑدہ غاتے پاکستان آ بننگ نا سلہ خلساپارے کہ ورنا تا تین پہ تینی تبادلہ بروک آ چین نا سرکڑدہ ئی ٹی پاک-چین سنگتی نا سوگو رشتہ غاتے جوڑ کننگ اٹ بھلو کڑد اس ادا کیک۔ چینی ورنا سروک آک پاکستان نا دورہ ءِ کرسا ہڑتوم آ ملک آتا الس و ورنا تا نیام اٹ رابطہ غاتے پین ودفنگ کیرہ۔ پروفیسر احسن اقبال پارے کہ سی پیک 2.0 ءِ ’اڑان پاکستان‘ نا فائیو ایز (5Es) فریم ورک تون ہم گرنچ کننگ انگ ءِ تانکہ پیداوار، جدت، گرین انرجی، برآمدات و علاقائی رابطہ غاتے مون آ دننگ مرے۔ او پارے کہ پاکستان سی پیک نا ارٹ میکو ریسہ ٹی صنعتی، کشاری ، ٹیکنالوجی و ایلو بشخ آتے ٹی کمکاری ءِ پین ودفنگ کن سنبرینگوک ءِ۔