پاکستان نا نہادی میرات ءُ، پاکستانی ورناک جتا جتا بشخ آتیٹی مچ آ دنیا ٹی پاکستان نا پن ءِ روشنا کرینو، سردار ایاز صادق

اسلام آباد۔ 12 اگست (اے پی پی) سپیکر قومی اسمبلی سردار ایاز صادق پارینے کہ ورناک پاکستان نا نہادی میرات ءُ، ننا ورناک بے پناہ لائخی تا مالک ءُ، پاکستانی ورناک جتا جتا بشخ آتیٹی مچ آ دنیاٹی پاکستان نا پن ءِ روشنا کرینو، ورناتے تعلیم، کسب و روزگار نا گچین وارخواہی فراوان کننگ المی ءِ ۔ دا خیال آتا درشانی ءِ او ورناتا جہانی دے انا وخت آ تینا اسہ کلہو اسے ٹی کرے۔ او پارے کہ ورناتا لائخی تے کاریم اٹ اتسا ملک ءِ شونداری نا کسر آ دننگ مریک، قومی اسمبلی ورناتے واکدار جوڑ کننگ و اوفتا راجی آسودہی کن کانودی سازی کن سنبرینگوک ءِ ، یوتھ انٹرنشپ پروگرام نا کمک اٹ ورناتے پارلیمانی امور آن روشناس کرفنگ انگ ءِ ۔ او پارے کہ ینگ پارلیمنٹیرینز فورم ورناتیٹی جمہوری شعور تالان کننگ اٹ فعال کڑد ادا کننگ ءِ ، ورناتا پارلیمانی عمل اٹ شمولیت جمہوریت نا مون آ دننگ کن المی ءِ ، ینگ پارلیمنٹیرینز فورم ورناتا ویل آتے تالان کننگ اٹ فعال کڑد ادا کننگ ءِ ، ینگ پارلیمنٹیرینز فورم ورناو پارلیمان نا نیام اٹ پول انا کڑد ادا کننگ ءِ ۔ او پارے کہ ورناتا پوسکن آ ٹیکنالوجی و مصنوعی ذہانت نا مہارت آتیان آراستہ مننگ ملک انا شونداری کن اہم ءِ ، حکومت پاکستان ورناتے روزگار نا باعزت وارخواہی فراوان کننگ کن اولیتی بنداو تیا گام گیج کننگ ءِ ، حکومت پاکستان نا کنڈآن پاکستان نا اولیکو نیشنل یوتھ ایمپلائمنٹ پالیسی ستاکڑزوک ءُ گام اسے۔ او پارے کہ پاکستان نا روشنا آخبت کن ورناتے واکدار جوڑ کننگ ننا اسیجائی زمواری ءِ ۔