پاکستان نا نہادی انسانی سرمایہ و روشنا آخبت نا ضمانت ءُ، اعظم نذیر تارڑ

اسلام آباد۔ 12 اگست (اے پی پی)بنجائی وزیر کانود، انصاف و انسانی حق، سینیٹر اعظم نذیر تارڑ پارینے کہ ورناک پاکستان نا نہادی انسانی سرمایہ و روشنا آخبت نا ضامن ءُ، ورنا تا توانائی، لائخی و تخلیقی سوچ ملک انا شونداری نا اہم ءُ کسر اسے۔ ورناتا جہانی دے انا وخت آ تینا کلہو اٹ بنجائی وزیر پارے کہ ورناتے واکدارجوڑ کننگ پاکستان نا آخبت اٹی زرکاری ءِ ، اوفتے آب اٹ تعلیم، کسب ، روزگار و بریبر وارخواہی فراوان کروئی مریک ۔ او پارے کہ ورناتا حق و آخبت نا رکھ ریاست نا اہم زمواری ءِ ، ورناتے قومی شونداری ٹی فعال کڑد تننگ وخت انا گرج ءِ ۔ تعلیم و کسبکاری ورناتے واکدار جوڑ کننگ نا بنداوی بنداوآک ءُ، وخت اس کہ ورناتے کن باعزت روزگار و زرگزرانی وارخواہی ودی کننگ المی ءِ ۔ سینیٹر اعظم نذیر تارڑ پارے کہ ورنا زالبول آتے بریبر وارخواہی و فیصلہ سازی ٹی گچین کڑد ادا کروئی مریک ، ورناتا لائخی تے مثبت آ کنڈ تننگ قومی شونداری کن المی ءِ۔ او پارے کہ کانود و آئین ورناتتون اوار ہر شاری نا بریبر حق آتا ضمانت ایتک، ورناتے درشانی سلاہ ، تعلیم و شونداری نا بریبر وارخواہی فراوان کروئی مریک ۔ ورناتیٹی سگ ، رواداری و زمواری نا قدر آتے مون آ دننگ ہم المی ءِ۔ بنجائی وزیر پارے کہ ورناک پاکستان نا راجی ، زرگزرانی و قومی آخبت نا اہم شریدار ءُ، اوفتا اوار مننگ آن بیدس پائیدار قومی شونداری ممکن اف۔ ورناک تینا لائخی تے ملک و قوم انا خذمت کن کاریم اٹ اتیر و دیانت داری، کانود پسندی و قومی زمواری ءِ تینا کڑد جوڑ کیر۔ او پارے کہ پاکستان نا آخبت لائخ، تعلیم یافتہ و واکدار ورناتتون گنڈوک ءِ، ورناتے واکدار جوڑ کرسا سوگو، جامع و شونہال پاکستان اس جوڑ کننگ مریک۔