دیامر بھاشا ڈیم پراجیکٹ ایریہ ٹی شونداری سکیم تیکن 97 کروڑ 25 لکھ روپئی جاری

اسلام آباد۔ 12 اگست (اے پی پی)دیامر بھاشا ڈیم پراجیکٹ ایریہ ٹی شونداری سکیم تے کن واپڈا نا کنڈآن ضلعی انتظامیہ ءِ 97 کروڑ 25 لکھ روپئی جاری کننگا۔ شونداری سکیم تا مسخت پراجیکٹ نا ایریہ ٹی زرگزرانی و راجی شونداری و ہندی مخلوق نا زند انا آب ءِ گچین کننگ ءِ۔ واپڈا نا ترجمان نا رداٹ پراجیکٹ نا ایریہ ٹی ہندی مخلوق نا گچینی و پت سازی نا گام گیج آتا رداٹ جم وڑاٹ 78 ارب 50 کروڑ روپئی خڑچ کننگ انگ ءِ، پت سازی نا برجاگام گیج آتا چرجوئی ٹی واپڈا دیامر بھاشا ڈیم پراجیکٹ نا ایریہ ٹی اہم شونداری سکیم تا عملدرآمد کن 97 کروڑ 25 لکھ روپئی جاری کرے۔ فنڈ آتا جاری کننگ نا دود کمشنر دیامر استور ڈویژن نا دفتر اٹ اڈ ہلک۔ دود اٹی کمشنر دیامر استور ڈویژن، جنرل منیجر/پراجیکٹ ڈائریکٹر دیامر بھاشا ڈیم پراجیکٹ، چیف انجینئر کنسٹرکشن ورکس، ڈائریکٹر جنرل سوشل سیف گارڈز، ڈپٹی کمشنر دیامر، ڈیم علماء کمیٹی نا باسک و ہندی سرکڑدہ غاک بشخ ہلکر۔واپڈا نا کنڈآن جاری کروک آ فنڈ آتیان ہمو شونداری اسکیم آتے پورو کننگک، ہرافتا مسخت ہندی مخلوق نا زند انا آب اٹی گچینی و پراجیکٹ نا ایریہ ٹی زرگزرانی و راجی شونداری ءِ۔ ہنداسکیم تیا عملدرآمد گلگت بلتستان نا حکومت نا تعلقدار محکمہ غاتا کمک اٹ ہندی مخلوق تون سلابت آن ضلعی انتظامیہ نا چاروکی ٹی کننگک۔تدوک آ تُو واپڈا و دیامر نا ضلعی انتظامیہ نا نیام اٹ دا شونداری سکیم تیا عملدرآمد کن مفاہمت نا یات داشت (ایم او یو) تیا دستخط کننگاسس۔ سکیم تا آب ، پیش رفت و وخت آ پورو مننگ کن ضلعی انتظامیہ، واپڈا و ہندی مخلوق نا نمائندہ غاتیا تالان نگران کمیٹی اس ہم جوڑ کننگک۔ دیامر بھاشا ڈیم پراجیکٹ آ پت سازی نا گام گیج آتا رداٹ واپڈا ہندی مخلوق نا راجی آسودہی کن بنداوی انفراسٹرکچر، تعلیم، جان جوڑی و راجی بہبود نا شونداری سکیم تیا 78 ارب 50 کروڑ روپئی خڑچ کننگ ءِ۔ کیڈٹ کالج چلاس و آرمی پبلک سکول تھور آن بیدس تھک و تھور نا پن بجلی گھرداتم اسکان پورو مروک آ ڈٹ آتیٹی نمان ءُ ۔ پراجیکٹ نا ایریہ ٹی ہندی مخلوق کن چندی پین شونداری سکیم تیا ہم کاریم برجاءِ۔