وزیراعلیٰ بلوچستان میر سرفراز بگٹی گوادر اٹ تدوک آ بیست سال انا شونداری وسیلہ غاتا جاچ پڑتال نا پرمان کرے

کوئٹہ۔ 12 اگست (اے پی پی ) وزیراعلیٰ بلوچستان میر سرفراز بگٹی پارینے کہ گوادر نا الس ءِ مون تروک ویل آتا ایسری کن غٹ سیاسی جماعت و ہندی اسٹیک ہولڈر آتے بِننگ کن بسونٹ، حکومت السی ویل آتا ایسری و ہندی آبادی نا روا حق آتا رکھ اکن عملی گام گیج کیک۔ او پارے کہ سرکاری ملازمت آتے ٹی ضلعی کوٹہ غا ہندی بندغ آتا بھرتی ءِ پک جوڑ کننگک و کس اسے نا حق ءِ خلنگ نا موکل تننگپک۔ وزیراعلیٰ بلوچستان نا گوادر آ بننگ آ انتظامی آفیسرآک اودے بخیرکریر، وخت اس کہ پولیس نا دستہ اودے سلامی پیش کرے۔ اوکان پد وزیراعلیٰ بلوچستان تون آل پارٹیز گوادر نا عہدیدار و سیاسی جماعت آتا نمائندہ غاک اوڑدہی کریر، ہراٹی گوادر نا حالیت، السی ویل، بنداوی آسراتی، روزگار و ایلو علاقائی باندات آتیا گپ و تران کننگا ۔ اوڑدہی نا وخت آ سیاسی جماعت آتا نمائندہ غاک گوادر نا ویل آتا ذکر ءِ کرسا بنداوی شاری آسراتی، ہندی ورناتے کن روزگار نا وارخواہی و درجہ چہارم نا آسامی تا ٹیسٹ و انٹرویو تے ہندی کہول آ اڈ تننگ نا خواست کریر۔وزیراعلیٰ میر سرفراز بگٹی سیاسی نمائندہ غاتا خواست آتا جاچ ءِ ہلسا گوادر تون اوار صوبہ نا غٹ ضلع غاتیٹی درجہ چہارم نا آسامی تا ٹیسٹ آتے ہندی کہول آ اڈ تننگ نا پرمان جاری کرے ۔ او پارے کہ سرکاری ملازمت آتے ٹی ضلعی کوٹہ غا عملدرآمد ءِ ہر حال اٹی پک جوڑ کننگک تانکہ ہندی ورناتے اوفتا روا حق ملے۔ وزیراعلیٰ پارے کہ ہچ ءُ ہندی اومیتدار اسے نا حق ءِ خلنگ نا موکل تفنہ ، بھرتی نا عمل اٹی میرٹ، شفافیت و ضلعی کوٹہ غا پابندی ءِ پک جوڑ کننگک۔ دا وخت آ وزیراعلیٰ محکمہ فشریز و محکمہ جنگلات گوادر نا درجہ چہارم نا آسامی تیا بے ہندی بندغ آتا تعیناتی نا غاو تانوٹس ءِ ہلک و چیف منسٹر انسپیکشن ٹیم ءِ باندات نا پورو انکوائری نا پرمان کرے ۔ او پارت کرے کہ انکوائری ءِ شفاف وڑاٹ پورو کرسا راستی تارداٹ رپورٹ پیش کننگے و اگہ کہول اسے آ قاعدہ و ضابطہ نا خلاف ورزی پک مرےتو زموار آتا برخلاف کانود نا رداٹ کارروائی کننگک۔میر سرفراز بگٹی پارے کہ گوادر بلوچستان کن بھاز اہمیت تخوک ءُ شار اسے و داجاگہ نا شونداری نا بھرمک غٹ آن مست ہندی آبادی اسکان سر مرے۔ او پارے کہ گوادر نا شونداری بیرہ بھلا شونداری ڈٹ آتے جوڑ کننگ نا پن اف بلکن ہندی الس ءِ بنداوی شاری آسراتی، روزگار، تعلیم، جان جوڑی، دیر و ایلو المی آآسراتی تا فراوانی ہم شونداری نا المی بشخ اسے۔ وزیراعلیٰ پارے کہ گوادر نا شونداری کن ہر دور اٹی دعویٰ کننگانے، داسہ گدرینگوک آ 20 سال نا ریکارڈ ءِ خننگک کہ گوادر نا شونداری کن اخس وسیلہ خڑچ کننگا و دا وسیلہ غاتا کاریم اٹ اتنگ آن الس نا زند اٹی اخس حقی پرخ بس ۔ او پارے کہ حکومت شونداری ڈٹ آتا اثر و الس ءِ دوئی مروک آ فائدہ غاتا جاچ ءِ ہلیک تانکہ آخبت نا ڈٹ بندی ڈغار نا حقیقت و السی گرج آتا رداٹ کننگ مرے۔ وزیراعلیٰ بلوچستان پارے کہ حکومت گوادر نا الس نا ویل آتا ایسر ی کن سیاسی جماعت، گچین مروک آ نمائندہ، ضلعی انتظامیہ و ہندی اسٹیک ہولڈر آتون سلابت نا چرجوئی ءِ برجاتخک۔ اوپیدوار کرے کہ السی غاو و روا خواست آتے گوجالنگپک بلکن اوفتا ایسری کن عملی گام گیج کننگک، میر سرفراز بگٹی پارے کہ گوادر بلوچستان نا شونداری نا اہم مرکز ءِ، ولے پائیدار شونداری ہمووخت آ ممکن ءِ ہراتم ہندی آبادی تینے شونداری نا عمل نا بشخ تکے و اودے تینا بنداوی حق و وارخواہی دوئی مرے۔ اوتعلقدار کمامدارآتے پارت کرے کہ گوادر نا السی ویل آتا ایسری، شونداری ڈٹ آتا گچین چاروکی و سرکاری وسیلہ غاتا شفاف کاریم اٹ اتنگ ءِ پک کننگے اوڑدہی ٹی گوادر آن گچینمروک آ قومی اسمبلی نا باسک شاہ گورگیج، صوبائی اسمبلی نا باسک گوادر مولانا ہدایت الرحمان، صوبائی وزیر میر ضیاء لانگو، سردار فیصل خان جمالی، قبائلی و سیاسی راہشون میر ساجد دشتی ، پرنسپل سیکرٹری عمران زرکون ، ڈپٹی کمشنر گوادر نقیب اللہ کاکڑ تون اوار ایلو تعلقدار انتظامی آفیسر آک ہم ساڑی ئسر۔