دوئیں براتیں اسلامی ملکاں وتی یکوئی ءُ براتی ءِ عملی ثبوت داتگ انت، وفاقی وزیر مواصلات عبدالعلیم خان

اسلام آباد۔9اگست (اے پی پی): وفاقی وزیر مواصلات عبدالعلیم خان ءَ پاکستان، سعودی عرب ءُ ترکی ءِ نیام ءَ گوستگیں یکجائی دیمپانی منوگریءَ را سرجمیں مسلم امت ءِ واستہ سنگ میل لیک اتگ ءُ گشتگ کہ دوئیں براتیں اسلامی ملکاں وتی یکوئی ءُ براتی ءِ عملی ثبوت داتگ انت۔ یک شمبے ءِ روچ ءَ مکہ ءَ پاکستان، ترکی ءُ سعودی عرب ءِ نیام ءَ دو نیمگی منوگری ءِ بابت ءَ گپ ءُ تران کنان ءَ آئی ءَ گوشت کہ اے سرجمیں مسلم امت ءِ واستہ راجدپتری روچ اِنت، وھدے کہ پاکستان، سعودی عرب ءُ ترکی ءَ انچیں راجدپتری منوگری ءِ سر ءَ دستخط کتگ کہ ایشی ءِ تہ ءَ مسلم امت ءِ واستہ سنگ میل ءِ بوھگ ءِ گنجائش است اِنت۔ آئی ءَ سرجمیں مسلم دگنیا، پاکستانی راج، سلاہ بندیں اُرد ءُ ملک ءِ سروکی ءَ را اے کامیابی ءِ پد ءَ مبارکی دات۔ عبدالعلیم خان ءَ مزن وزیر محمد شہباز شریف ءُ فیلڈ مارشل سید عاصم منیر ءَ را اے منوگری ءِ ممکن جوڑ کنگ ءَ کلیدی کرد پیلو کنگ ءِ ھاتر ءَ دل ءِ تہ ءَ چہ مبارکی دات۔ آئی ءَ گوشت کہ مرچی پاکستانی راج، پاکستانی قوت ءُ پاکستانی سروکی ءَ دگنیا ءِ تہ ءَ وتی سر برز ءَ چست کتگ انت۔ اے پُر شانیں ساھت ءَ سرجمیں مسلمانیں راج وش اِنت کہ پاکستان، ترکی ءُ سعودی عرب ءَ یکجائی ءَ وعدہ کتگ کہ سئیں ملکانی تہ ءَ یکے ءِ سر ءَ ھرچ وڑیں اُرش یکجائی اُرش زانگ بیت ءُ یکجاہ جنگ بیت۔ وفاقی وزیر ءَ یک رندے پدا سرجمیں راج ءَ را منوگری ءِ کامیابی ءِ سر ءَ مبارک بات دات۔