پولیس ءِ شہید آنی قربانی سرجمیں راج ءِ واستہ پھر ءِ وسیلہ انت، ریلوے ءِ وفاقی وزیر

اسلام آباد۔4اگست  (اے پی پی): ریلوے ءِ وفاقی وزیر محمد حنیف عباسی ءَ ’’پولیس شہید آنی روچ‘‘ ءِ موہ ءَ راج ءِ بہادریں زھگ آناں خراج تحسین پیش کنان ءَ گوشت کہ مھروانیں وطن ءِ رکھینگ ءُ امن ءُ ایمنی ءِ برجائی ءِ واستہ پولیس ءِ قربانی سرجمیں رنگ ءَ ناقابل فراموش انت۔ وفاقی وزیر ءَ وتی یک گشتانک ءِ تہ ءَ گوشت کہ ناشرکاری ءُ جرم ءِ ھلاسی ءِ واستہ پولیس فورس ءِ نیمگ ءَ پیشہ وارانہ ھنر ءُ بہادری ءِ درشان کنگ ستا کرز انت۔ خیبر پختونخوا ءُ بلوچستان ءَ ھوار سرجمیں ملک ءِ پولیس کارندہاں امن ءِ ھاتر ءَ وتی جان ندر کتگ ءُ سرجمیں راج ایشانی جزم ءُ روح ءَ سلام اِنت۔ شہید آں گوں سرجمیں یکوئی ءِ درشان کنان ءَ محمد حنیف عباسی ءَ گوشت کہ پولیس شہید آنی کھول آنی قربانی سرجمیں راج ءِ مشترکہ سرمایہ انت ءُ حکومت ایشانی گوما شانک ماں شانک ءَ اوشتاتگ۔ پولیس شہیدانی روچ مارا یک پیغامے دنت کہ ما اے محافظانی بے دروریں ھزمتاں منّیں ءُ آیانی یاتاں تازگ بہ داریں۔ آئی ءَ اے گپ ءِ سر ءَ زور پر دات کہ ملک ءَ دائمی امن ، کانود ءِ غیر جانبدار نفاذ ءُ ایمنی ءِ واستہ یک مھکمیں ، نوکیں ءُ لائکیں پولیس فورس ءِ جوڑ کنگ المی اِنت۔