پاکستان ءُ ایران ءِ نیام ءَ دو نیمگی بیپار ءَ را 10 ارب ڈالر ءَ سر کنگ بیت،  جام کمال خان

اسلام آباد۔4اگست  (اے پی پی): وفاقی وزیر برائے تجارت جام کمال خان ءَ گوشت کہ پاکستان ءُ ایران ءِ نیام ءَ دو نیمگی تجارت ءِ کساس ءَ را 10 ارب ڈالر ءَ سر کنگ بیت، دوئیں ملک آنی راجدپتری براتی سیادی آناں یک مھکمیں اقتصادی شریداری ءِ تہ ءَ بدل کنگ وھد ءِ لوٹ اِنت۔ آئی ءَ اے ھیالانی درشانی سئے شمبے ءِ روچ ءَ ایران ءِ صنعت ءُ تجارت ءِ وزیر ڈاکٹر محمد عطابک ءِ گوما پاکستان ءُ ایران ءِ یکجائی تجارت کمیشن ءِ دہمی گند ءُ نند ءِ شریک سروکی ءَ کنان ءَ کت۔ فورم ءَ گوں گشتانک دیان ءَ جام کمال خان ءَ گوشت کہ پاک ایران ءِ آزاد بیپاری معاہدہ زوت گڈی رنگ ءَ جوڑ کنگ بیت ایشی ءِ تہ ءَ دوئیں ملک آنی نیام ءَ بارٹر ٹریڈ ھم گیش کنگ بیت۔ آئی ءَ گوشت کہ سیم سر ءِ رسد، کسٹم ءُ کارگو ءِ نقل و حرکت ءِ تہ ءَ رکاوٹ آنی ھلاسی ناگزیر اِنت، ءُ یکجائی سیم سر ءِ مارکیٹ ءُ الیکٹرانک ڈیٹا انٹرچینج ءِ جوڑیشت ءَ چہ دو نیمگی تجارت ءَ را مزنیں کساسے ءَ گیشی بیت۔ جام کمال خان ءَ گوشت کہ دوئیں ملک آنی جندی شوبگ تجارت ءِ واستہ تیار انت، حکومت آنی ذمہ واری انت کہ آ سازگار ءُ معتبریں کاروباری ماحول ءَ پجاری بہ کن انت۔ آئی ءَ گوشت کہ جے ٹی سی ءِ 10می دیوان ءَ چہ یک کار ءِ لائکیں روڈ میپ ءِ جوڑ کنگ ءَ چہ اقتصادی کمک ءَ را نوکیں بالاد ءَ سر کنگ بیت۔ جام کمال ءَ گوشت کہ پاکستان ءُ ایران ءِ جندی ادارگ آناں بیپار ءِ چست ءُ ایر آنی واستہ دلبڈی دیگ بوھگ ءَ انت، پاک ایران ءِ بیپار ھم گیش بوھگ ءَ انت۔ آئی ءَ گوشت کہ تجارت ءِ دیمروئی ءِ واستہ سازگاریں چاگرد ءِ پجاری کنگ بوھگ ءَ انت۔ فورم ءَ گوں گشتانک دیان ءَ ایران ءِ وزیر تجارت محمد عطابک ءَ گوشت کہ تجارت ءِ واستہ یکجائی راہ آنی ضلورت انت، ما لوٹ ایں کہ وتی ھمساھگ آنی گوما جوانیں سیادی بہ بیت ھاسیں رنگ ءَ پاکستان ءِ گوما دو نیمگی تجارتی سیادی جوانیں رنگ ءَ بہ بنت۔ آئی ءَ گوشت کہ ما دو نیمگی تجارت ءَ را نوکیں کوھنڈگ ءَ سر کنگ ءِ واستہ جزمیگ ایں، تجارت ءُ معیشت ءِ گہتری ءِ واستہ یک دومی ءِ تجروبت آں چہ سیت چست کن ایں۔ محمد عطابک ءَ گوشت کہ ما بیپار ءِ نوکیں دور ءَ داخل بوھگ ءَ آں، مارا پاکستان ءِ گوما دراجیں مدتی اسٹریٹجک شریکداری لوٹ ایت، ما دوئیں ملک آنی دوستی ءَ را پجائی اقتصادی شریکداری ءِ تہ ءَ بدل کنگ لوٹ ایت۔ ڈاکٹر محمد عطابک ءَ کراچی ءُ گوادر ءِ بندرگاہ آنی وسیلگ ءَ دمگی تجارت ءُ رسد ءِ کمک ءَ را گیش کنگ ءِ واھشت ھم درشان کتگ۔ ایران ءِ وزیر ءَ امیت سہرا کت کہ پاک ایران ءِ آزات بیپاری معاہدہ زوت سرجم کنگ بیت ۔ ڈاکٹر محمد عطابک ءَ بجلی ءِ سوداگری ءُ دمگی رابطہ ءَ را دوئیں ملکانی ھاتر ءَ نوکیں اقتصادی موہ لیک اِتگ۔