حکومت معیشت ءَ را مھکم ءُ برجمیں دیمروئی ءِ راہ ءَ ایر کنگ ءِ ھاترا اصلاحات ءِ ایجنڈا ءِ سر ءَ سرجمی ءَ عمل کنگ ءَ برجاہ اِنت، مزن وزیر شہباز شریف ءَ گوں ورلڈ بینک ءِ ڈل ءَ گپ ءُ تران

اسلام آباد۔31جولائی  (اے پی پی): مزن وزیر محمد شہباز شریف ءَ پاکستان ءِ دیمروئی ءِ سفر ءِ تہ ءَ ورلڈ بینک ءِ برجاھیں کمک ءِ ساڑات ءُ گوشت کہ حکومت معیشت ءَ را مھکم ءُ پائیداریں دیمروئی ءِ راہ ءَ ایر کنگ ءِ واستہ اصلاحات ءِ ایجنڈا ءِ سر ءَ سرجمی ءَ عمل کنگ ءَ برجاہ اِنت۔ اے ھیالانی درشانی آئی ءَ ورلڈ بینک ءِ کنٹری ڈائریکٹر بولورما امگبزار ءِ سروکی ءَ ڈل ءَ گوں تران کنان ءَ کت آئی ءَ جمعہ ءِ روچ ءَ ادا گند ءُ نند کت۔ ڈل ءَ را وش اتک کنان ءَ مزن وزیر محمد شہباز شریف ءَ ورلڈ بینک ءِ گوما پاکستان ءِ دیریں وھد ءِ شریکداری ءَ را ساڑات ءُ پاکستان ءِ چاگردی ءُ اقتصادی دیمروئی ءِ تہ ءَ ادارگ ءِ کرد ءَ را ساڑات۔ مزن وزیر ءَ پاکستان ءِ دیمروئی ءِ سفر ءَ مُدامی کمک ءِ پد ءَ ورلڈ بینک ءِ شگر ءُ منت گپت۔ مزن وزیر ءَ گوشت کہ حکومت معیشت ءَ را مھکم ءُ برجمیں دیمروئی ءِ راہ ءَ ایر کنگ ءِ واستہ اصلاحات ءِ ایجنڈا ءِ سر ءَ سرجمی ءَ عمل کنگ ءَ برجاہ اِنت۔ مزن وزیر ءَ گوشت کہ پاکستان ءِ آئینی وفاقی ڈھانچہ، صوبائی وت واجہی ءُ وفاق ءُ صوبہ آنی نیام ءَ وت مہ وتی کمک ءُ شور ءُ سلاھ ملک ءِ دیمروئی ءُ برجائی ءِ واستہ بنیاتی ارزشت ءِ دار اَنت۔ ورلڈ بینک ءِ ملکی ڈائریکٹر ءَ ’’پاکستان ءَ مالیاتی وفاقیت ءِ مھکم کنگ‘‘ ءِ سر ءَ رپورٹ پیش کت ءُ ایشی ءِ تہ ءَ ھواریں چیز آنی بابت ءَ سرپدی دات۔ ورلڈ بینک ءِ ڈل ءَ وتی رپورٹ ءِ بنجاہی نکات پیش کنگ ءِ وھد ءَ 18می آئین ترمیم ءُ 7می راجی مالیاتی کمیشن ایوارڈ ءَ پد پاکستان ءَ مالیاتی وفاقیت ءِ ردوم ، آمدنی ، ھرچ ءُ درچ ، وفاقی ءُ صوبائی مالیاتی سیادی ، ادارگی سرکاری وسیلگ آنی کارمردی ءُ سرکاری وسیلگ ءِ کارمرد کنگ ءِ بابت ءَ وتی تجزیہ ءُ ھیال آنی شیئر کتگ۔ ڈل ءَ وتی رپورٹ ءِ تہ ءَ جتا جتائیں پالیسی ءِ سفارش ھم پیش کتگ اَنت کہ ایشی ءِ مول ءُ مراد مالیاتی نظم و ضبط ءِ دیمروئی، وسیلگ آناں جوانیں رنگ ءَ کارمرد کنگ، سروس ڈیلیوری ءِ تہ ءَ گہتری ءُ وفاقی ءُ صوبائی ادارگ آنی نیام ءَ جوانیں کمک ءِ دیمروئی اِنت۔ مزن وزیر ءَ گوشت کہ ورلڈ بینک ءِ نیمگ ءَ پیش کتگیں تجزیہ ءُ میاں اوستمانی تجربگ آنی رژنائی ءَ تقابلی چار ءُ تپاسی ستا کرز ایت، اے رنگیں پٹ ءُ پول پالیسی جوڑ کنگ ءِ عمل ءَ کارآمدیں رہشونی پجارینگ ءَ کلیدی ارزشت ءِ واھند اَنت۔ مزن وزیر ءَ رپوٹ ءِ سرجمیں چار ءُ تپاسی ءِ واستہ مزن تک ءِ کمیٹی جوڑ کنگ ءِ پنت ءُ شون کتگ۔ اے کمیٹی ورلڈ بینک ءِ رپورٹ ءَ پیش کتگیں سفارشات ءِ سر ءَ چار ءُ تپاسی کنت ءُ پاکستان ءِ آئینی ءُ وفاقی ڈھانچہ ءَ را ھیال ءَ دارگ ءَ گوں سیادی داروکیں سٹیک ہولڈر آنی گوما شور ءُ سلاھ ءَ چار ءُ تپاسی کنت تانکہ کار ءِ لائکیں تجویز آناں راجی مفاد ءِ رد ءَ چار ءُ تپاسی کنگ بہ بیت۔ گند ءُ نند ءَ نائب مزن وزیر ءُ   وزیر خارجہ محمد اسحاق ڈار، وفاقی وزرا احد خان چیمہ اور احسن اقبال، مشیر وزیر اعظم ڈاکٹر سید توقیر شاہ، وزیر مملکت بلال اظہر کیانی  ءُ سرکاری مزنیں کارندہ آں بہر زرتگ۔