مزن وزیر ءَ آذربائیجان ءِ گوما براتی سیادی ءَ را گیش مھکم کنگ ءِ جزم  ءِ درشان

اسلام آباد۔31جولائی  (اے پی پی): مزن وزیر محمد شہباز شریف ءَ آذربائیجان ءِ گوما براتی سیادی ءَ را گیش مھکم کنگ ءِ واستہ پاکستان ءِ بے دروریں جزم ءِ یک رندے پدر کت۔ جمعہ ءِ روچ ءَ مزن وزیر محمد شہباز شریف ءَ را پاکستان ءَ جمہوریہ آذربائیجان ءِ سفیر خضر فرہادوف ءِ نیمگ ءَ چہ الوداعی کال رستگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ اے موہ ءِ سر ءَ نائب مزن وزیر ءُ دری کارانی وزیر سینیٹر محمد اسحاق ڈار ءُ دری کارانی سیکرٹری آمنہ بلوچ ھم ساڑی بوتگ اَنت۔ گند ءُ نند ءِ ساھت ءَ مزن وزیر ءَ وتی سفارتی ذمہ واری آنی ساھت ءَ پاکستان ءُ آذربائیجان ءِ نیام ءَ گہتریں براتی سیادی آناں دیمروئی دیگ ءِ واستہ آذربائیجان ءِ سفیر خضر فرہادوف ءِ دلجمیں کوشست آناں ساڑات۔ مزن وزیر ءَ سیاسی، تجارت، اقتصادی، دفاعی، دود ءُ ربیدگی ءُ مردم آنی نیام ءَ رابطہ ءَ ھوار جتا جتائیں شوبگ آنی تہ ءَ دو نیمگی کمک ءَ را دیمروئی دیگ ءِ واستہ آئی ءِ ازمت آناں توسیپ کت، ھاسیں رنگ ءَ دوئیں ملک آنی نیام ءَ براہ راست بالی گراب آنی بندات کنگ ءِ تہ ءَ۔ مزن وزیر ءَ آذربائیجان ءِ صدر الہام علیوف ءَ را وتی نیکیں واھشت آنی درشانی کت ءُ گوستگیں دو ءُ نیم سال آنی تہ ءَ آذربائیجان ءِ بازیں تر ءُ تاب ءُ جولائی 2024 ءَ صدر الہام علیف ءِ پاکستان ءِ تر ءُ تاب ءِ یات ءَ کت۔ سفیر فرہادوف ءِ دور ءَ ایر کنگ بوتگیں مھکمیں بُن ھشت آیوکیں وھد ءَ دوئیں ملک آناں وتی سیادی ءَ را گیش وسعت دیگ ءِ تہ ءَ رھشونی کنگ ءَ برجاہ دار ایت۔ مزن وزیر ءَ سفیر خزر فرھادوف ءِ آیوکیں ذمہ واری آنی تہ ءَ جوانیں ءُ سوبمندی ءِ واھشت ھم گوشت۔ خزر فرہادوف ءَ مزن وزیر ءِ سفارتی ذمہ واری آنی ساھت ءَ حکومت ءُ پاکستان ءِ الس ءِ نیمگ ءَ چہ گرمائش، مہمانداری ءُ سرجمیں کمک ءِ سر ءَ مزن وزیر ءِ شگر ءُ منت گپت۔ آئی ءَ پاکستان ءَ وتی پوسٹنگ ءَ را وتی سفارتی کیریئر ءِ یک یاتگار ءُ فخر مندیں باب ءِ رنگ ءَ گشتگ ءُ پاکستان ءِ گوما اسٹریٹجک شراکت داری ءَ را گیش گہتر کنگ ءِ ھاتر ءَ آذربائیجان ءِ جزم ءِ پدا زور داتگ۔ اے موہ ءِ سر ءَ آئی ءَ مزن وزیر ءَ را پاکستان ءَ وتی کھول ءِ تجربتانی سرا نبشتہ کتگیں کتابے ھم دات۔