سینیٹ ءَ ورنا آنی تہ ءَ جمہوری سرپدی ءِ دیمروئی ءِ واستہ موسم گرما ءِ انٹرنشپ پروگرام بندات کتگ

اسلام آباد۔30جون  (اے پی پی): چیئرمین سینیٹ سید یوسف رضا گیلانی ءَ ورنا آنی تہ ءَ جمہوری، آئینی ءُ پارلیمانی سرپدی ءِ دیم ءَ برگ ءِ واستہ پاکستان ءِ سینیٹ ءَ شش ہفتگ ءِ سمر انٹرنشپ پروگرام ءِ بنگیج کتگ۔ اے پروگرام ءِ مول ءُ مراد ملک ءِ نامداریں یونیورسٹی آنی نودربر آناں پارلیمانی نظام، قانون سازی ءُ پالیسی سازی ءِ عملی پڑ آنی تہ ءَ آشنا کنگ اِنت۔ اے پروگرام ءِ تہا نیشنل ڈیفنس یونیورسٹی، نیشنل یونیورسٹی آف ماڈرن لینگوئجز، انٹرنیشنل اسلامک یونیورسٹی اسلام آباد، فاسٹ نیشنل یونیورسٹی، قائد اعظم یونیورسٹی، بحریہ یونیورسٹی ءُ نیشنل یونیورسٹی آف سائنسز اینڈ ٹیکنالوجی ءِ باصلاحیتیں نودربر بھمکزورگ ءَ انت۔ انٹرنشپ ءِ وھد ءَ نودربراں سینیٹ ءِ دیوان، قانون سازی ءِ عمل، قائمہ کمیٹی آنی کارروائی، پارلیمانی نگرانی، سینیٹ سیکرٹریٹ ءِ سرکاری پالیسی سازی ءُ انتظامی کار آنی چار ءُ تپاسی ءِ موہ رس ایت تانکہ آ پارلیمانی جمہوریت ءُ ریاستی ادارگ آنی کرد ءَ را شرتر سرپد بہ بنت۔ پروگرام ءِ بندات ءَ چہ پیسر 22 ءَ بگر داں 29 جون 2026ءَ پاکستان انسٹی ٹیوٹ آف پارلیمانی سروسز ءِ نیمگ ءَ یک ہفتگے ءِ اورینٹیشن پروگرام ءِ ہم برجم دارگ بوتگ ات کہ ایشی ءِ تہا بھمکزوروکاں پارلیمانی نظام ءُ قانون سازی ءِ جتا جتائیں تک ءُ پہنات آنی بابت ءَ سرپدی دیگ بوتگ ات۔ انٹرنشپ ءِ بھر ءِ رد ءَ 62 انٹرن ءَ پارلیمنٹ گس ءِ تر ءُ تاب کتگ ات ایشی ءِ تہ ءَ سیکرٹری سینیٹ سید حسنین حیدر ءُ سینیٹ سیکرٹریٹ ءِ مزنیں افسر آنی نیمگ ءَ آھاں وش آتک کنگ بوت۔ سیکرٹری سینیٹ ءَ نودربر آناں زور پر دات کہ آ انٹرنشپ ءِ وھد ءَ وتی ذمہ واری آناں سرجمیں دلگوشی ءُ محنت ءَ گوں پیلو بہ کن اَنت، سینیٹ ءِ کارروائی آناں سرجمیں رنگ ءَ کارمرد بہ کن اَنت ءُ آیوکیں وھد ءَ ملک ءِ دیمروئی ءِ تہ ءَ جوانیں کرد پیلو بہ کن اَنت۔ ایشی ءَ پد سینئر افسر آں پاکستان ءِ سینیٹ ءِ انتظامی ءُ کانود ءِ کار آنی بابت ءَ انٹرن آناں سرجمیں بریفنگ ھم دات۔ سینیٹ ءِ چیئرمین سید یوسف رضا گیلانی ءَ گوشت کہ زمہ واریں شہری ءُ آیوکیں سروکی ءِ تیاری ءِ واستہ ورنا آناں جمہوری ادارگ آنی گوما بکشک راست جوڑ کنگ المی اِنت۔ آئی ءِ رد ءَ اے پروگرام ورنا آنی تہ ءَ آئینی ءُ جمہوری شعور، کانودی آگاہی ءُ پارلیمانی نظام ءِ تہ ءَ بامردیں بھر زوری ءِ دیمروئی ءِ نیمگ ءَ یک ھاسیں گامگیج اِنت۔ سینیٹ سیکرٹریٹ ءَ وتی عزم ءِ پدا زور دات کہ آیوکیں وھد ءَ ھم اے وڑیں گامگیج برجاہ دارگ بنت تانکہ ورنا آناں راجی ادارگ آنی گوما ھمگرنچ کنگ ءُ جمہوری حکومت داری ءِ سر ءَ الس ءِ اعتماد ءَ را گیش مھکم کنگ بہ بیت۔ انٹرن آں اے گامگیج ءَ را وش اتک کت ءُ چیئرمین سینیٹ سید یوسف رضا گیلانی ءِ سروکی ءَ را ساڑات کت ءُ امیت ءِ درشان کت کہ انٹرنشپ ءِ سرجمی ءَ پد پارلیمانی نظام ءُ قانون سازی ءِ عمل ءَ گوں سیادی داروکیں ارزشتی ایں عملی تجربگ ءِ رسگ ءَ انت۔