مزن وزیر ءِ چین ءِ تر ءُ تاب پاک چین ءِ اسٹریٹجک شریکداری ءِ نوکیں جزم ءِ درشان اِنت، ضمیر اسدی

اسلام آباد۔24مئی  (اے پی پی): چین انٹرنیشنل پریس کمیونیکیشن سینٹر ءِ ریسرچ فیلو محمد ضمیر  اسدی ءَ مزن وزیر محمد شہباز شریف ءِ چین ءِ گوستگیں تر ءُ تاب ءَ را لس ارزشت ءِ لیک اتگ ءُ گشتگ کہ اے ایوک ءَ باقاعدہ یا سفارتی تر ءُ تاب نہ انت بلکیں چین ءُ پاکستان ءِ نیام ءَ نوکیں اسٹریٹجک شریکداری ءِ یک ھاسیں ءُ طاقتوریں درشان انت۔ یک شمبے ءِ روچ ءَ جاڑی بوتگیں بیان ءِ تہ ءَ آئی ءَ گوشت کہ پاکستان ءُ چین ءِ سیادی وھد ءِ ھمراھی ءَ گیش مھکم ءُ ستراتیژیک رنگ ءَ المی بوھگ ءَ اَنت۔ دوئیں ملک آں مدام مشکلیں وھد ءَ یک ءِ دومی ءِ کمک کتگ ءُ یکے دومی ءِ سر ءَ بھروسہ، یکجائی مفاد ءُ دمگی امن ءُ ایمنی ءِ وژن ءَ را دیم ءَ برتگ۔ ضمیر  اسدی ءَ گوشت کہ مزن وزیر محمد شہباز شریف ءِ اے تر ءُ تاب ھما وھد ءَ بوھگ ءَ انت کہ دمگ ءُ جھان ءِ تہ ءَ ترندی ءَ گوں بدل بوھوکیں جیو پولیٹیکل جاور ھال نوکیں چیلنج ءُ موہ پیداک کنگ ءَ انت۔ آئی ءَ گوشت کہ اے درگت ءَ پاکستان ءُ چین ءِ نیام ءَ مزن تک ءِ رابطہ دوئیں ملک آنی نیام ءَ اسٹریٹجک رابطہ آناں گیش مھکم کنگ ءَ ھاسیں کرد پیلو کنت۔ آئی ءَ گوشت کہ اقتصادی کمک، تجارت، سرمایہ کاری، بنیاتی ڈھانچگ، ٹیکنالوجی، کشت ءُ کشاری، توان ءُ دفاع ءَ ھوار جتا جتائیں پڑ آنی تہ ءَ کمک ءِ نوکیں موہ پیداک بنت۔ ھاسیں رنگ ءَ چین ءُ پاکستان اقتصادی راہداری ءِ دومی بھر ءِ چیر دستی ءَ صنعتی کمک، ھاسیں اقتصادی زون، سبز توانائی ءُ ڈیجیٹل معیشت ءِ پڑ ءَ پیشرفت ءِ گمان اِنت۔ آئی ءَ گوشت کہ چین مدام پاکستان ءِ معتبریں سنگت ءِ رنگ ءَ ثابت بوتگ ءُ دوئیں ملک آنی نیام ءَ سیادی ایوک ءَ حکومت آنی تہ ءَ نہ بندوک انت بلکینگ ءَ الس ءِ تک ءَ گہتریں جزباتی ءُ راجدپتری سیادی آنی سر ءَ ھم بنیات انت۔ ضمیر  اسدی ءَ گیش گوشت کہ دوئیں ملک آنی نیام ءَ ”آہنی برات“ ءِ شریکداری دمگی امن، اقتصادی دیمروئی ءُ رابطہ کاری ءِ دیمروئی ءِ تہ ءَ کلیدی کرد پیلو کنگ ءَ اِنت۔ آئی ءَ گوشت کہ مزن وزیر محمد شہباز شریف ءِ اے تر ءُ تاب ءَ چہ نہ ایوک ءَ دو نیمگی سیادی آناں نوکیں رنگ ءُ دروشم رس ایت بلکینگ ءَ سرمایہ کاری، اقتصادی زندگ بوھگ ءُ دمگی کمک ءِ رد ءَ ھم جوانیں نتیجہ دیم ءَ کیت۔ آئی ءَ امیت سہرا کت کہ پاکستان ءُ چین آیوکیں سال آنی تہ ءَ وتی شریکی ءَ را گیش پراھ ءُ برز کن اَنت ءُ یکجائی دیمروئی ءُ وشھالی ءِ نوکیں مول ءُ مراد آناں پیلو کن اَنت۔