کوئٹہ ءَ مسافر ٹرین ءِ سرا وت کُشی اُرش انتہائی بزدلانہ، غیر انسانی ءُ مذمت ءِ لائک انت، وفاقی وزیر ڈاکٹر طارق فضل چوہدری

اسلام آباد۔24مئی  (اے پی پی): پارلیمانی کارانی وفاقی وزیر ڈاکٹر طارق فضل چوہدری ءَ گوشت کہ کوئٹہ ءَ مسافر ٹرین ءِ سر ءَ وت کُشیں اُرش انتہائی بزدلانہ، غیر انسانی ءُ مذمت ءِ لائکیں ناشرکاری اِنت۔ بے گناہیں شہری، زالبول، زھگ ءُ پیریں مردمانی نشانگ جوڑ کنگ اے گپ ءِ ثبوت اِنت کہ ناشرکاریں عناصر نہ ایوک ءَ امن ءِ دژمن اَنت بلکیں انسانی زند ءِ شرپ ءِ ھم ھچ وڑیں احترام نہ کن اَنت۔ یک شمبے ءِ روچ ءَ سوشل نیٹ ورکنگ ویب سائٹ ایکس ءِ سر ءَ وتی پوسٹ ءِ تہ ءَ وفاقی وزیر ءَ گوشت کہ ما اے غمناکیں وئیل ءَ شھید بوتگیں مردمانی کھول ءِ گوما دلپدردی ءِ درشان کن ایں ءُ ٹپی آنی زوت جان سلامتی ءِ دعا کن ایں ۔ آئی ءَ گوشت کہ پاکستان ءِ بہادریں سیکورٹی فورسز ءُ کانود نافذ کنوکیں ادارگ ناشرکاری ءِ ھوپ ءِ ھلاسی ءِ واستہ شپ ءُ روچ کار کنگ ءَ انت ءُ اے وڑیں بزدلیں اُرش کدی ھم راج ءِ حوصلہ ءَ سست نہ کن انت۔ ڈاکٹر طارق فضل چوہدری ءَ گوشت کہ ناشرکاری ءِ ھلاپ ءَ سرجمیں راج یکجائی ءَ انت ۔ پاکستان ءُ ھاسیں رنگ ءَ بلوچستان ءِ امن ءُ ایمنی ءِ راج ءِ دژمنیں عناصر ءِ ناپاکی ءِ ارادہ ھچبر سوبمند بوھگ ءِ موہ دیگ نہ بنت۔ آئی ءَ اے گپ پدر کت کہ ناشرکار ءُ آھانی آسراتی کارندہ آناں انصاف ءِ دیم ءَ آرگ ءَ چہ انصاف ءِ لوٹ پیلو کنگ بنت۔