زیرو ٹالرنس پالیسی ءِ چیر دستی ءَ انسانی سوداگری ءِ نیٹ ورک ءِ سر ءَ کریک ڈاؤن ءِ کارروائی گیش کنگ بوتگ، طلال چوہدری

اسلام آباد۔22مئی  (اے پی پی): تہی کار ءُ منشیات ءِ کنٹرول ءِ وزیر مملکت طلال چوہدری ءَ راجی اسمبلی ءَ گوں تران کنان ءَ گوشت کہ مزن وزیر ءِ غیر قانونی امیگریشن ءِ ھوالگ ءَ زیرو ٹالرنس پالیسی ءِ رد ءَ ملک ءِ تہ ءُ در ءَ انسانی دزگیری ءِ نیٹ ورک آنی ھلاپ ءَ سکیں گامگیج زورگ بوھگ ءَ اِنت۔ جمعہ ءِ روچ ءَ راجی اسمبلی ءَ کمبوڈیا ءَ مبینہ سائبر کرائم ءُ اسکیم ءِ ھوالگ ءَ کیس آنی تہ ءَ دزگیر بوتگیں پاکستانی شہری آنی بابت ءَ نوٹس ءِ پسو ءَ آئی ءَ گوشت کہ جون 2023ءَ چہ ناجائزیں امیگریشن ءَ ھواریں 3158 ایجنٹ دزگیر کنگ بوتگ اَنت۔ مزنیں کساسے ءَ زرّ منجمد کنگ بوتگ اَنت۔ آئی ءَ گوشت کہ وفاقی پٹ ءُ پولی ادارگ ءِ تہ ءَ ھم احتساب کنگ بوتگ، ایشی ءِ تہ ءَ لھتیں افسر اے وڑیں نیٹ ورک آنی کمک ءَ ھوار بوتگ اَنت۔ درگیتک. بازیں کیسانی تہا پٹ ءُ پول ءَ پد سرجمیں شفٹ کشگ بوتگ انت۔ آئی ءَ گوشت کہ ایف آئی اے ءِ 100 ءَ چہ گیش افسر آنی سر ءَ انسانی سوداگری ءِ تہ ءَ مبینہ کرد ءِ سر ءَ انضباطی کارروائی کنگ بوتگ ایشی ءِ تہ ءَ مجرمانہ کیس ءُ سزا ھوار اَنت۔ وزیر ءَ گوشت کہ برجاھیں کارروائی ءِ مول ءُ مراد منظم نیٹ ورک آناں ھلاس کنگ اِنت کہ آ ناجائزیں ہجرت ءِ راہ ءُ جعلی سفری بندوبست آنی وسیلگ ءَ شہری آناں لالچ دیگ ءَ اَنت۔ آئی ءَ گوشت کہ درملک ءَ روگ ءِ مسافر اگاں آھانی گور ءَ جائزیں پاسپورٹ ءُ ویزا ھم بہ بیت برے برے آھاں گیشیں پروفائلنگ ءُ اسکریننگ کنگ لوٹ ایت تانکہ قانونی سفری چینل آنی ناجائز کارمرد کنگ ءَ را رکگ بہ بیت۔ آئی ءَ درائینتگ کہ اے نظام سمگلنگ نیٹ ورک ءَ گوں سیادی داروکیں ہائی رسک ٹریول پیٹرن ءِ پجارینگ ءَ کمک کنت، البت ایشی ءَ چہ لھتیں مسافر آنی شکایت ھم بوتگ کہ آ سرجمیں دستاویزات ءِ ھست بوھگ ءِ باوجود آف لوڈ کنگ بوتگ اَنت۔ آئی ءَ گوشت کہ مھکمیں نگرانی ءِ سبب ءَ ناجائزیں ھجرت ءِ کوشست آنی تہ ءَ نزیک ءَ 47درسد کمی بوتگ کہ ایشی ءَ چہ مزنیں گہتری یے۔ آئی ءَ اے گپ ءِ سر ءَ زور پر دات کہ نظام ءِ مول ءُ مراد حقیقی مسافر آناں بند کنگ نہ اِنت بلکیں انسانی دزگیری ءِ نیٹ ورک آناں بند کنگ اِنت۔ آئی ءَ گوشت کہ کمبوڈیا ءِ روٹ آنی سر ءَ ھاسیں دلگوشی دیگ بوتگ کہ اودا بازیں پاکستانی جعلی نوکری ءِ منصوبگ آنی تہ ءَ دست کپتگ ءُ دزگیر کنگ بوتگ اَنت یا کانودی کارروائی ءِ آماچ بوتگ اَنت۔ آئی ءِ رد ءَ 2024 ءُ 2025 ءِ ساھت ءَ اے وڑیں کیسانی تہ ءَ گیشی بوتگ کہ ایشی ءِ سر ءَ کانود ءِ نفاذ ءِ سکیں گامگیج چست کنگ بوتگ۔ گیشیں ھال ءُ اھوال دیان ءَ آئی ءَ گوشت کہ ایف آئی اے ءَ کمبوڈیا ءِ ھوالگ ءَ 286 انکوائری کتگ کہ ایشی ءِ تہ ءَ 111 مجرمانہ کیس درج کنگ بوتگ۔ آئی ءَ گوشت کہ مشکوکیں سفری راہ آناں کارمرد کنان ءَ مسافر آناں پجارینگ ءِ واستہ پروفائلنگ سسٹم جوڑ کنگ بوتگ۔ انوگ ءَ تاں 222مسافر احتیاط ءِ رد ءَ بالی پٹ آنی سر ءَ ایر کنگ بوتگ اَنت۔ آئی ءَ گوشت کہ اے وھد ءَ کمبوڈیا ءَ نزیک ءَ 15ہزار پاکستانی است انت ایشانی تہ ءَ بازیں مردم آن لائن نوکری ءِ اسکیم آنی آماچ بوتگ انت۔ آئی ءَ گوشت کہ کمبوڈیا ءِ حکومت ءَ ھم جاور ھال آنی رد ءَ ضوابط ءَ را گیش ءُ گیوار کتگ۔ 1272 آماچیں پاکستانی آنی سر ءَ ایر کنگ بوتگیں نزیک ءَ یک ملین ڈالر ءِ جرمانہ ھمگرنچی ءِ وسیلگ ءَ معاف کنگ بوتگ اَنت وھدیکہ آھانی واتر بوھگ ءِ واستہ ایمرجنسی ٹریول دستاویزات ءُ پاسپورٹ جاری کنگ بوتگ اَنت۔ ایشی ءِ تہ ءَ 631 ایمرجنسی ٹریول دستاویز، 112 نوکیں پاسپورٹ ءُ 75 نوکیں پاسپورٹ ھوار اَنت۔ آئی ءَ اے گپ ءِ پدرائی کتگ کہ کمبوڈیا ءَ چار پاکستانی شہری بیران بوتگ ءُ آیانی لاش وتی ڈیھ ءَ واتر کنگ بوتگ اَنت۔ آئی ءَ گوشت کہ اے راہ کمبوڈیا ءَ سر بوھگ ءَ پیسر تھائی لینڈ، ملائیشیا ءُ میانمار ءَ ھوار بازیں ملک آنی تہ ءَ چہ گوز ایت ءُ پیچیدہ ٹریفکنگ نیٹ ورک آنی سر ءَ جوڑ بیت۔ آئی ءَ گوشت کہ ایف آئی اے ءِ سرپدی گامگیج ءُ وزارت ءِ درئی کار آنی پنت ءُ شون برجاہ انت بلے انگت ءَ بازیں شہری ایجنٹ ءُ آن لائن فراڈ ءِ آماچ بوھگ ءَ انت۔ آئی ءَ گوشت کہ آماچیں پاکستانی ءِ مزنیں کساس ءَ جان سلامتی ءَ آرگ بوتگ۔