پشاور ءَ چہ آوار جنگ بوتگیں جنک ءِ زوت برآمد کنگ ءِ ھاترا شکار پور ءَ آپریشن برجاہ اِنت، وزیر ءِ تہی کاراں راجی اسمبلی ءَ پسو دات

اسلام آباد۔22مئی  (اے پی پی): تہی کارانی وزیر مملکت طلال چوہدری ءَ گوشت کہ پشاور ءَ چہ آوار جنگ بوتگیں جنک شکار پور ءِ دمگ کوٹ شاھو پولیس اسٹیشن ءِ سیمسر آنی تہ ءَ دارگ بوتگ کہ اودا آپریشن برجاہ اِنت ءُ مرچی یک ڈنگے کشگ بوتگ۔ جنک زوت وش کنگ بیت۔ جمعہ ءِ روچ ءَ راجی اسمبلی ءَ جمال خان کاکر ءَ اے نیمگ ءَ دلگوش گور کتگ ءُ گشتگ کہ کچہ ءِ دمگ ءِ ڈنگاں پشاور ءَ چہ 11 سالی جنک آوار جتگ ءُ تاوان ءِ واستہ یک ءُ نیم لک کلدار لوٹ کتگ۔ وھدے آئی ءِ مات گوں اے زرّاں آئی ءِ رکّینگ ءَ شُت گڑا آئی ءِ سر ءَ زوراکی کنگ بوت۔ آئی ءَ را وش کنگ بہ بیت ءُ ادا آپریشن کنگ بہ بیت۔ ایشی ءِ پسو ءَ طلال چوہدری ءَ گوشت کہ کچھا ءِ دمگ ءَ پنجاب ءَ دیمروئی پیکج دیگ بوتگ، ادا نوں نو گو ءِ دمگ نیست، سندھ ءَ ھم ھمے رنگیں کارروائی کنگ بوھگ ءَ اِنت۔ آئی ءَ گوشت کہ اے معاملہ گوستگیں روچ ءَ سینیٹ ءَ ھم چست کنگ بوتگ۔ اے جنک ءَ ڈنگ علی گوہر جتوئی ءِ دست ءَ اِنت، آئی ءِ قبیلہ ہمے بستار ءَ زورگ ءَ اِنت کہ اے جنک گرگ بوتگ۔ اے کار ءَ ھواریں لھتے جنین آدم دزگیر کنگ بوتگ اَنت۔ اودا آپریشن ءِ سرا انت۔ مرچی یک ڈنگے کُشگ بوتگ ۔ یک عیسائی جینیفرے ھم چہ اودا رکّینگ بوتگ۔ ایس ایس پی آپریشن ءِ سروکی ءَ کنگ ءَ اِنت۔ آئی جی سندھ ءَ گوں سرجمی ءَ رابطہ است انت ۔ اے جنک ءِ سیادی ہچ قوم ءُ استان ءِ نہ انت، پاکستان ءِ انت، زوت آجو بیت۔