وفاقی داخلہ ءِ وزیر ءَ دوئیں ملک آنی سروکی ءُ الس آناں پاک چین ءِ 75 سالی سفارتی سیادی ءِ سرجمی ءِ سر ءَ مبارک بات داتگ

اسلام آباد۔21مئی  (اے پی پی): وفاقی تہی کارانی وزیر محسن نقوی ءَ دوئیں ملک آنی سروکی ءُ الس آناں پاک چین ءُ چین ءِ 75سال ءِ سفارتی سیادی ءِ سرجمی ءِ سر ءَ مبارک بات داتگ ءُ چین ءِ صدر شی جن پنگ، چین ءِ کمیونسٹ پارٹی ءُ الس ءَ را نیکیں واھگ آنی درشان کتگ۔ پنچ شمبے ءِ روچ ءَ وزارت داخلہ ءِ نیمگ ءَ جاڑی بوتگیں بیان ءِ رد ءَ وزیر داخلہ محسن نقوی ءَ وتی ھاسیں کلوہ ءِ تہ ءَ گوشت کہ پاک چین ءِ 75سال ءِ دوستی بے دروریں بھروسہ، دائمی مہر ءُ دلجمیں کمک ءِ کسہ اِنت۔ پاک چین ءِ 75سال ءِ سفارتی سیادی ءِ بے درور یں سرجمی یک راجدپتری سنگ میل ءِ انت۔ چین پاکستان ءِ معتبر تریں ءُ پائیداریں اسٹریٹجک شریک اِنت۔ گلوبل منظر نامہ ءِ تہا بدلی اتکگ انت بلے پاک چین ءِ سٹیل ءِ جزم ءُ ابدمانیں دوستی ءِ تہا ہچ وڑیں بدلی نہ بوتگ۔ دفاعی کمک ءَ چہ اقتصادی شراکت داری ءَ پاک چین ءِ سیادی دمگ ءَ برجائی  ءُ دیمروئی ءِ یک درپشناکیں درور  جوڑ بوتگ انت۔ سی پیک دوئیں ملک آنی نیام ءَ اقتصادی کمک ءُ برجمیں دیمروئی ءِ وثیقہ اِنت۔ تہی کارانی وزیر ءَ گوشت کہ پڑ ءَ امن، وشھالی ءُ برجائی ءِ واستہ پاکستان ءُ چین ءِ موقف مدام یک بوتگ۔ قدرتی آفت بہ بنت یا جھان ءِ وبا چین ءَ مدام پاکستان ءِ ھمراھی ءَ اوشتاتگ ءُ برات ءِ حق ءَ پیلو کتگ۔ پاک چین ءِ دوستی پیسر ءَ چہ گیش مھکم، گہتر ءُ ناقابل شکست بوتگ۔ وفاقی وزیر داخلہ ءَ گوشت کہ پاک چین ءِ دوستی ھمک روچ ءِ گوزگ ءَ گوں مھکم، پائیدار ءُ گیشیں بالاد ءَ سر بوھگ ءَ انت۔ پاکستان ءُ چین راجدپتری ءُ آئیڈیل دوستی ءِ تہا دراڑ پیداک کنگ ءِ ہچ وڑیں سازش ءَ را سوبمند بوہگ ءِ موہ نہ دنت۔