پاکستان ءُ چین ءِ نیام ءَ سیادی ایوک ءَ سفارتی سیادی نہ انت بلکیں یک شریکداری یے کہ ایشی ءِ بنیات ءَ اعتماد، یکے دومی ءِ احترام، مشترکہ دیمروئی ءُ ابدمانیں دوستی انت، پروفیسر احسن اقبال

اسلام آباد۔20مئی  (اے پی پی): منصوبگ بندی، دیمروئی، اصلاحات ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ پاکستان ءُ چین ءِ نیام ءَ سیادی ایوک ءَ سفارتی سیادی نہ انت بلکیں بھروسہ، وت مہ وتی احترام، یکجائی دیمروئی ءُ ابدمانیں دوستی ءِ سر ءَ بنیات ءِ شریکداری انت کہ وھد ءِ گوزگ ءَ گوں گیش مھکم بوھگ ءَ انت۔ دوئیں ملک ہر گرانیں ساھت ءَ یکے دومی ءِ ھمراہ بوتگ اَنت ءُ آھانی دوستی مرچی پہ دگنیا ءَ یک مثالی سیادی یے جوڑ بوتگ۔ آئی ءَ اے ھیالانی درشانی پاکستان ءُ چین ءِ نیام ءَ سفارتی سیادی ءِ جوڑ بوھگ ءِ 75 سال ءِ درگت ءَ اسلام آباد ءَ پاکستان ءُ چین دوستی مرکز ءَ برجم داشتگیں ھاسیں دود ءُ ربیدگ ءِ مراگش ءَ گوں گشتانک دیان ءَ کت۔ مراگش ءَ وفاقی وزیر ءِ اھوالکاری ءُ شنگکاری عطا اللہ ترار، سیکرٹری وزارت ءِ اھوالکاری اشفاق احمد خلیل، سفارتکار، دانشور، ازمکار، نودربر ءُ زند ءِ جتا جتائیں تک ءُ پھنات ءِ نامداریں مردم آنی بھر زوری بوتگ۔ پروفیسر احسن اقبال ءَ گشتگ کہ پاکستان ءُ چین ءِ دوستی ءَ را دنیا ”ہمالیہ ءَ چہ بُرز تر، چہ دریا ءَ گہتر، شہد ءَ چہ شیرکن تر ءُ سٹیل ءَ چہ مھکم تر“ لیکیت، اے ایوک ءَ جذباتی نعرہ نہ انت بلکیں عملی حقیقت انت۔ آئی ءَ گوشت کہ دوئیں ملک آناں مدام یک دومی ءِ بنیاتی مفاد آنی احترام کتگ ءُ ھمک جھان ءُ دمگی چیلنج آنی تہ ءَ یک دومی ءِ کمک کتگ۔ وفاقی وزیر ءَ گوشت کہ گوستگیں 75سال آنی تہ ءَ پاکستان ءُ چین ءِ سیادی ءَ مُدام دیمروئی کتگ ءُ مرچی ایشاں یک ٹوھیں اسٹریٹجک شریکداری ءِ رنگ زرتگ۔ آئی ءَ گوشت کہ چین ءُ پاکستان اقتصادی راہداری (سی پیک) اے دوستی ءِ مستریں ءُ عملی درشان اِنت ایشی ءَ پاکستان ءَ دیمروئی ءُ وشھالی ءِ نوکیں دروازگ پچ کتگ اَنت۔ آئی ءَ گوشت کہ سی پیک ایوک ءَ سڑک، بجلی گس ءُ صنعتی زون آنی یک مچی ءِ نہ انت بلکینگ ءَ اے یک انچیں وژن ءِ انت کہ ایشی ءِ تہ ءَ دمگی رابطہ، اقتصادی کمک ءُ یکجائی دیمروئی ءَ را دیم ءَ برگ بیت۔ آئی ءَ گوشت کہ سی پیک ءَ پاکستان ءِ توان ءِ ضلورت آناں پیلو کنگ، صنعتی چست ءُ ایر آناں گیش کنگ، روزگار ءِ موہ پیداک کنگ ءُ ڈیجیٹل کنکٹیویٹی ءَ را گہتر کنگ ءَ کلیدی کرد پیلو کتگ۔ پروفیسر احسن اقبال ءَ گوشت کہ گوادر بندر سی پیک ءِ تاج انت ءُ آیوکیں وھد ءَ سرجمیں دمگ ءِ واستہ اقتصادی چست ءُ ایر آنی ھاسیں مرکز جوڑ بیت۔ آئی ءَ گوشت کہ پاکستان وت ءَ را دمگی تجارت، ٹرانزٹ ءُ کمک ءِ مرکز ءِ رنگ ءَ گندگ ءَ انت وھدیکہ چین ءِ گوما شریکداری اے وژن ءِ پیلو کنگ ءَ بنیاتی کرد پیلو کنگ ءَ انت۔ آئی ءَ گوشت کہ اگاں انفراسٹرکچر ءُ معیشت اے شریکداری ءِ مھکمیں بُن ھشت انت بلے دود ءُ ربیدگ، آرٹس ءُ مردم آنی نیام ءَ رابطہ پاک چین ءِ دوستی ءِ اصل روح انت۔ آئی ءَ گوشت کہ دود ءُ ربیدگی تبادلہ ءَ چہ دوئیں راج آنی نیام ءَ مہر، یکوئی ءُ یکوئی ءِ دیمروئی بیت ءُ نوکیں نسل آناں یک ءُ دومی ءِ گوما نزیک کن اَنت۔ وفاقی وزیر ءَ گوشت کہ موسیقی، شائری، دود ءُ ربیدگ ءُ وانگ ءُ زانگی سیادی آنی وسیلگ ءَ دوئیں ملک آنی الس آنی نیام ءَ سیادی گیش مھکم بوھگ ءَ انت۔ آئی ءَ گوشت کہ مرچی ءِ دود ءُ ربیدگ ءِ مراگش ھمے جذبہ ءِ آدینک انت۔ پروفیسر احسن اقبال ءَ گوشت کہ جھان ءِ معیشت ءِ مرکز ایشیا ءِ نیمگ ءَ گوں ترندی ءَ رھادگ بوھگ ءَ انت ءُ اے وڑیں وھد ءَ پاکستان ءُ چین ءِ نیام ءَ شریکداری ءَ را گیش ارزشت زرتگ۔ آئی ءَ گوشت کہ دمگی رابطہ ءِ واستہ دگہ گچین کاری نہ انت بلکیں یک ناگزیریں ضلورت ءِ انت۔ پاکستان ءُ چین یکجائی ءَ دمگ ءَ دیمروئی، برجائی ءُ وشھالی ءِ واستہ نوکیں موہ پیداک کنگ ءَ انت۔ آئی ءَ گوشت کہ پاکستان بیلٹ اینڈ روڈ انیشیٹیو، سی پیک، گلوبل ڈویلپمنٹ انیشیٹیو، گلوبل سیکورٹی انیشیٹیو ءُ گلوبل سیویلائزیشن انیشیٹیو ءِ چیر دستی ءَ چین ءِ گوما کمک ءَ را گیش دیم ءَ برگ ءَ انت تانکہ جنوبی ملک آنی نیام ءَ کمک ءُ دیمروئی ءِ نوکیں دور ءِ بندات کنگ بہ بیت۔ وفاقی وزیر ءَ گوشت کہ پاکستان ءِ ھیال اِنت کہ دیمروئی یکجائی سفر اِنت ایشی ءَ چہ مقابلہ ءِ وسیلہ نہ اِنت۔ آئی ءَ گوشت کہ چین ءِ گوما پاکستان ءِ شریکداری ءَ چہ دگنیا ءَ را اے کلوہ رس ایت کہ وت مہ وتی کمک، شرپ ءُ شرپ ءُ یکجائی دیمروئی پائیداریں وشھالی ءِ بنیات انت۔ آئی ءَ مراگش ءِ برجم دارگ ءِ واستہ وفاقی وزیر ءِ اھوالکاری ءُ نشریات عطا اللہ ترار ءُ وزارت ءِ اھوالکاری ءُ نشریات ءِ منت گپت ءُ گوشت کہ پاک چین ءِ دوستی آیوکیں نسل آنی واستہ امن، دیمروئی، استحکام ءُ یکجائی وشھالی ءِ رژنائیں نشان ءِ رنگ ءَ مانیت۔ مراگش ءِ گڈسرا پاکستان ءُ چین ءِ دود ءُ ربیدگاں پدر کنگ ءِ ھاترا ھاسیں دود ءُ ربیدگ ءِ پروگرام ھم پیش کنگ بوتگ اَنت کہ ایشی ءَ ھواریں مردماں سک باز ستا کرتگ۔