پاکستانی دکہ میان اُستمانی ایشیا ءِ ھاترا ھاسیں تجارتی دروازگ جوڑ بوھگ ءِ گنجائش است انت، جنید انور چوہدری

اسلام آباد۔20مئی  (اے پی پی): وفاقی وزیر برائے میری ٹائم محمد جنید انور چوہدری ءَ قازقستان ءِ سرمایہ کار آناں گوادر ءُ کراچی دکہ آنی تہ ءَ سرمایہ کاری ءُ یکجائی منصوبگ آنی واستہ دعوت داتگ ءُ گوشت کہ پاکستان ءِ دکہ میاں اوستمانی ملک آنی واستہ دمگی ءُ جھان ءِ مارکیٹ آناں سر بوھگ ءِ یک موثر وسیلگ جوڑ بوت کنت۔ وزارت ءِ نیمگ ءَ چہ جاڑی بوتگیں پریس ریلیز ءِ رد ءَ چار شمبے ءِ روچ ءَ قازقستان ءِ کمپنی فریڈم ہولڈنگ کارپوریشن ءِ سی ای او تیمور تارلو ءِ سروکی ءَ قازقستان ءِ 11باسکی ڈل ءِ گوما گند ءُ نند ءِ ساھت ءَ وفاقی وزیر ءَ ٹرانس شپمنٹ آپریشن ، آف ڈاک ءُ ملٹی پرسٹ ڈاک ءِ آسراتی ءِ تہ ءَ کمک ءِ امکانات آنی سر ءَ تران کت۔ محمد جنید انور چوہدری ءَ دمگی بیپار ءِ تہ ءَ کراچی ءُ گوادر ءِ اسٹریٹجک ارزشت ءِ سر ءَ زور پر دیان ءَ گوشت کہ پاکستان ءِ میری ٹائم انفراسٹرکچر ءَ چہ میاں اوستمانی سرمایہ کار آناں مزنیں موہ رس ایت۔ آئی ءَ گوشت کہ گوادر فری زون آنی تہ ءَ یکجائی منصوبگ آنی وسیلگ ءَ قازقستان ءَ را دمگی ءُ جھان ءِ تجارتی مارکیٹ آناں گہتریں رسائی ءِ واستہ کمک رس ایت۔ ڈل ءَ پاکستان ءِ میری ٹائم سیکٹر ءَ سرمایہ کاری ءِ واستہ سک باز واھشت ءِ درشان کت ءُ حکومت ءِ اقتصادی ءُ میری ٹائم پالیشی آنی سر ءَ دل یکیمی ءِ درشان کت۔ وفاقی وزیر ءَ فریڈم ہولڈنگ کارپوریشن ءَ را پاکستان ءِ نیلیں معیشت ءَ گوں سیادی داروکیں منصوبگ آنی تہ ءَ بھر زوری ءِ دعوت دیگ ءِ وھد ءَ گوشت کہ پاکستان ءِ دکہ قازقستان ءُ میاں اوستمانی ایندگر زمینی ملک آنی واستہ خلیج، افریقہ ءُ جنوب مشرقی ایشیائی مارکیٹ آنی تہ ءَ سر بوھگ ءِ واستہ یک ھاسیں دروازگ جوڑ بوت کنت۔ گند ءُ نند ءَ پاکستان ءُ میاں اوستمانی ملک ھاسیں رنگ ءَ قازقستان ءِ نیام ءَ سڑک، ریل ءُ بالی رابطہ ءِ دیمروئی ءِ سر ءَ ھم ھیال ریچی کنگ بوت تانکہ دمگی تجارتی یکوئی ءَ را گیش مھکم کنگ بہ بیت۔ اے موہ ءِ سر ءَ تیمور ترلوف ءَ پاکستان ءِ دیمروئی کنوکیں میری ٹائم سیکٹر ءِ سر ءَ دل یکیمی ءِ درشان کت ءُ گوشت کہ آئی ءِ کمپنی پاکستان ءِ اقتصادی اولیت آنی رد ءَ دراجیں مدت ءِ اسٹریٹجک سرمایہ کاری ءِ امکانات آنی ارزشت ءَ کنگ ءَ اِنت۔