جہانی جان سلامتی ءِ چیلنج آنی گیواری ءِ واستہ یکجائی کوشست ءُ میاں اوستمانی کمک المی اِنت، وفاقی جان سلامتی ءِ وزیر مصطفی کمال جنیوا ءَ برجم داشتگیں جہانی جان سلامتی اسمبلی ءِ 79می دیوان ءَ گوں تران کنان ءَ گشتانک

اسلام آباد۔20مئی  (اے پی پی): وفاقی جان سلامتی ءِ وزیر مصطفیٰ کمال ءَ جنیوا ءَ جھان ءِ جان سلامتی اسمبلی ءِ 79می دیوان ءَ گوں تران کنان ءَ گوشت کہ جھان ءِ جان سلامتی ءِ جیڈھ آناں گیواری ءِ واستہ یکجائی کوشست ءُ میاں اوستمانی کمک المی اِنت۔ وزارت جان سلامتی ءِ نیمگ ءَ جاڑی بوتگیں بیان ءِ رد ءَ آئی ءَ گوشت کہ پاکستان ءَ جتا جتائیں چیلنج آنی باوجود جان سلامتی ءِ شوبگ ءَ مزنیں پیشرفت کتگ۔ زچگی ءُ چُک ءِ بیرانی ءِ کچ کم بوتگ ءُ ایمونائزیشن ءِ کوریج ھم گیش بوتگ۔ وفاقی جان سلامتی ءِ وزیر ءَ گوشت کہ یونیورسل ہیلتھ کوریج ءِ انڈیکس 40درسد ءَ چہ 56درسد ءَ سر بوتگ۔ پاکستان ءَ ٹی بی، ایچ آئی وی، ملیریا، ڈینگی ءُ ہیپاٹائٹس ءِ وڑیں وبائشی نادراہیانی حلاف ءَ وتی گامگیجاں گیش مھکم کتگ۔ آئی ءَ گوشت کہ پولیو ءِ ھلاسی پاکستان ءِ مستریں راجی ترجیح انت ءُ اے رد ءَ میاں اوستمانی کمک ستا کرز انت۔ آئی ءَ گوشت کہ پاکستان زوت پولیو ءَ چہ پاکیں ملک جوڑ بوھگ ءِ ہدف ءَ گوں نزیکی ءَ انت۔ وفاقی جان سلامتی ءِ وزیر ءَ گوشت کہ 10سالی جان سلامتی ءُ آبادی ءِ حکمت عملی ءِ سر ءَ ترندی ءَ گوں عمل کنگ بوھگ ءَ اِنت ءُ ملک ءَ درمان ءِ سر ءَ بنیات ءِ نظام ءَ چہ پیشگیری ءِ نظام ءَ مزنیں پیشرفت کنگ بوھگ ءَ اِنت۔ آئی ءَ گوشت کہ پاکستان ءَ وتی اولی راجی ویکسین پالیشی ءِ منظوری داتگ وھدیکہ بنجاہی تک ءَ ویکسین جوڑ کنگ ءِ واستہ راجی ءُ میاں اوستمانی شریکداری ءَ را ھم سہرا کنگ بوھگ ءَ انت۔ وفاقی وزیر جان سلامتی ءَ گوشت کہ نادراھیانی ھلاپ ءَ راجی گامگیج آناں گیش موثر جوڑ کنگ بوھگ ءَ انت۔ آئی ءَ گوشت کہ پاکستان ءِ 188 میڈیکل کالج آنی تہ ءَ ھمک سال 22ہزار ءَ چہ گیش ڈاکٹر پیداک بوھگ ءَ انت کہ آ نہ ایوک ءَ ملک ءَ بلکینگ ءَ سرجمیں دگنیا ءَ ازمت کنگ ءَ انت۔ وزیر جان سلامتی مصطفیٰ کمال ءَ چہ میاں اوستمانی براتی ءَ زور پر دات کہ آ جان سلامتی ءِ شوبگ ءَ پائیدار دیمروئی ءِ ہدف آناں سرجم کنگ ءِ واستہ انسانی سرمایہ ءِ تہ ءَ یکجائی سرمایہ کاری ءَ را دیمروئی بہ دنت۔