وفاقی وزیر قیصر احمد شیخ، پاکستان ءُ چین بزنس فورم ءِ صدر ءُ چینی سرمایہ کار آنی مزن تک ءِ ڈل ءَ آئی ءَ گوں گند ءُ نند کت، اقتصادی کمک، سرمایہ کاری ءِ دیمروئی ءُ جتا جتائیں شوبگ آنی تہ ءَ یکجائی منصوبگ آنی امکان آنی سر ءَ گپ ءُ تران

اسلام آباد۔20مئی  (اے پی پی): وفاقی وزیر ءُ سرمایہ کاری بورڈ ءِ چیئرمین قیصر احمد شیخ ءَ گوں پاکستان ءُ چین بزنس فورم ءِ صدر ءُ چینی سرمایہ کار آنی مزن تک ءِ ڈل ءَ گند ءُ نند کت، ایشی ءِ تہ ءَ پاکستان ءُ چین ءِ جتا جتائیں شوبگ آنی تہ ءَ اقتصادی کمک، سرمایہ کاری ءِ دیمروئی ءُ یکجائی منصوبگ آنی امکان آنی سر ءَ سرجمیں رنگ ءَ گپ ءُ تران کنگ بوت۔ گند ءُ نند ءِ تہ ءَ دوئیں ملک آنی نیام ءَ اقتصادی سیادی آناں گیش مھکم کنگ ءُ نوکیں سرمایہ کاری موہ آناں پٹ ءُ پول کنگ ءِ سر ءَ تپاک کنگ بوت۔ ڈل ءَ پاکستان ءَ ھاسیں رنگ ءَ کشت ءُ کشاری، انفارمیشن ٹیکنالوجی، آٹوموبائل ءُ انجینئرنگ ءِ شوبگ آنی تہ ءَ سرمایہ کاری ءِ مزنیں موہ آنی تہ ءَ سک باز دلگوشی ءِ درشان کت۔ اے موہ ءِ سر ءَ وفاقی وزیر قیصر احمد شیخ ءَ گوشت کہ پاکستان ءِ حکومت درملکی سرمایہ کار آنی واستہ سازگار ءُ ایمنیں کاروباری چاگرد ءِ پجاری ءَ را دل یکیمی کنگ ءَ انت تانکہ سرمایہ کاری ءِ عمل ءَ را گیش آسان ءُ جوان جوڑ کنگ بہ بیت۔ آئی ءَ گوشت کہ حکومت ءِ سرمایہ کار دوستیں پالیشی ءُ کاروبار ءِ تہ ءَ آسانی ءِ گامگیج آنی سبب ءَ پاکستان ءَ درملکی سرمایہ کاری ءِ رجحان گیش بوھگ ءَ انت۔ سی پیک ءِ چیر دستی ءَ برجاھیں منصوبگ دوئیں ملک آنی نیام ءَ اقتصادی شریکداری ءَ را نوکیں رنگ ءُ دروشم دیگ ءَ انت ایشی ءِ آسر ءَ صنعتی، تجارتی ءُ کاروباری چست ءُ ایر آنی تہ ءَ مزنیں گیشی ءِ امیت انت۔ وفاقی وزیر ءَ گوشت کہ پاکستان وتی جغرافیائی ارزشت، ورنا کارکن ءُ مزنیں مارکیٹ ءِ سبب ءَ سرمایہ کار آنی واستہ سک باز موزوں ملک جوڑ بوتگ۔ آئی ءَ اے گپ ءِ سر ءَ زور پر دات کہ پاکستان ءِ حکومت ملک ءَ صنعتی دیمروئی ءَ را دیم ءَ برگ ، برآمدات ءِ تہ ءَ گیشی ءُ روزگار ءِ نوکیں موہ پیداک کنگ ءِ واستہ میاں اوستمانی سرمایہ کار آنی گوما کمک ءَ را دیم ءَ برگ ءَ انت۔ گند ءُ نند ءَ کاروباری سیادی ءَ را گیش مھکم کنگ ءِ سر ءَ ھم زور پر دات ءُ اے گپ ءِ سر ءَ تپاک کنگ بوت کہ پرائیویٹ سیکٹر ءِ نیام ءَ نزیکیں کمک دوئیں ملک آنی اقتصادی دیمروئی ءَ ھاسیں کرد پیلو کت کنت۔ چینی ڈل ءَ پاکستانی حکومت ءِ نیمگ ءَ چہ دیم ءَ آؤرتگیں اصلاحات، یک ونڈو ءِ آسراتی ءُ سرمایہ کار آناں داتگیں ترغیب آناں ساڑات ءُ پاکستان ءِ جتاجتائیں شوبگ آنی تہ ءَ سرمایہ کاری ءَ را گیش کنگ ءِ واستہ واھشت ءِ درشان کت۔ اے موہ ءِ سر ءَ بورڈ آف انویسٹمنٹ ءَ سرمایہ کار آناں ھمک رنگ ءِ آسراتی پجاری کنگ ءِ وتی جزم ءِ پدا پدر کت۔ وفاقی وزیر قیسر احمد شیخ ءَ گوشت کہ پاکستان ءِ حکومت خطہ ءَ ملک ءَ را یک دلکشیں سرمایہ کاری مرکز جوڑ کنگ ءِ واستہ یک سرجمیں حکمت عملی ءِ سر ءَ عمل کنگ ءَ انت ءُ پاک چین ءِ اقتصادی کمک ءَ را گیش وسعت دیگ حکومت ءِ اولی ترجی آنی تہ ءَ ھوار انت۔