پاکستان ءُ چین ءِ نیام ءَ 75سال ءِ سفارتی سیادی ءِ سرجمی ءِ موہ ءَ چین ءِ ڈل ءَ راجی اسمبلی ءِ تر ءُ تاب کتگ ءُ سیشن   ءِ کارروائی ءِ  چارتگ

اسلام آباد۔20مئی  (اے پی پی): پاکستان ءُ چین ءِ نیام ءَ 75سال ءِ سفارتی سیادی ءِ سرجمی ءِ موہ ءَ چین ءِ ڈل ءَ راجی اسمبلی ءِ تر ءُ تاب کتگ ءُ دیوان ءِ کاروائیانی گواہ بوتگ انت۔ اے موہ ءِ سر ءَ توامیں پارلیمانی گلاں چین ءِ ڈل ءَ را گرمیں وش اتک کت ءُ چین ءُ پاکستان ءِ دوستی ءَ را ہمالیہ ءَ چہ برز ءُ دریا ءَ چہ جہل لیک ات۔ چار شمبے ءِ روچ ءَ وھدے ڈل راجی اسمبلی ءِ دیوان ءِ کارروائی آنی چارگ ءِ واستہ مہمان گیلری ءَ اتک گڈا باسک آں میز ءِ سر ءَ زنگ جنان ءَ آئی ءَ را وش آتک کت۔ قومی اسمبلی ءِ اسپیکر سردار ایاز صادق ءَ چینی ڈل ءَ را وش آتک کنان ءَ گوشت کہ پاک چین ءِ سیادی ءَ چہ 75سال سرجم بیت، ما چینی ڈل ءَ را قومی اسمبلی ءَ وش آتک کناں۔ اپوزیشن رہشون محمود خان اچکزئی ءَ چینی ڈل ءَ را وش اتک کتگ ءُ گشتگ مئے ءُ سرکار ءِ نیام ءَ مزنیں تپاوت است انت کہ ما ایشاں یک نیمگے ایر کنان ءَ ادا اتکگیں ۔ ما چینی ڈل ءِ آیگ ءَ گوں اسمبلی ءِ دیوان ءِ بائیکاٹ ھلاس کت۔ آئی ءَ گوشت کہ ما چین ءِ ڈل ءَ را قومی اسمبلی ءَ سر بوھگ ءِ سر ءَ وش آتک کناں، چین ءِ مھربانی ءَ پاکستان کدی شموشکار نہ بیت۔ پیپلز پارٹی ءِ مزنیں سروک سید نوید قمر ءَ گوشت کہ من پیپلز پارٹی ءِ نیمگ ءَ چین ءِ ڈل ءَ را وش آتک کن آں، ذوالفقار علی بھٹو ءِ گوں چین ءِ سروکی ءَ سک باز ھاسیں سیادی بوتگ۔ آئی ءَ گوشت کہ آصف علی زرداری ءَ چین ءِ ھمک دمگ آنی تر ءُ تاب کتگ، پاکستان ءُ چین ءِ نیام ءَ ھچ وڑیں سادگیں سیادی نیست، من ھمک پاکستانی ءِ نیمگ ءَ چین ءِ ڈل ءَ را وش اتک کناں۔ ایم کیو ایم ءِ راجی اسمبلی ءِ باسک سید امین الحق ءَ گوشت کہ آئی ءِ پارٹی پاک چین دوستی ءَ را مزنیں کسہ لیک ایت، چین ءَ ھمک مشکل ءَ پاکستان ءِ کمک کتگ، پاکستان ءُ چین ءِ سیادی ءَ مدام دگنیا ءِ پیسلہ آنی تہ ءَ ھاسیں کرد پیلو کتگ۔ جمیعت علماء اسلام ءِ باسک شاہدہ اختر علی ءَ گوشت کہ من مولانا فضل الرحمن ءِ نیمگ ءَ چین ءِ ڈل ءَ را وش اتک کناں۔ من چینی ڈل ءَ را وش آتک کناں۔ 75 سال دوستی ءِ بنیاد مخلصی، حمایت ءُ تعاون ءِ سرا انت۔ من دوئیں ملک آنی سروکی ءَ را یات کناں۔ قومی اسمبلی ءِ اپوزیشن ءِ باسک ارباب شیر علی ءَ گشتگ تحریک انصاف ءِ بانی چیئرمین ءَ پارٹی ءَ را ہدایت داتگ کہ چین ءِ گوما سیادی ءِ سرا ہچ وڑیں مصالحت نہ بیت۔ تحریک انصاف ہر قیمت ءَ سی پیک ءَ دیما برگ ءِ سرا دلجم انت۔