چیئرمین سینیٹ ءَ نرسنگ کمیونٹی، پیرامیڈیکل اسٹاف ءُ جان سلامتی ءِ شوبگ ءِ کارندہ آناں توسیپ ءُ ستا پیش کتگ

اسلام آباد۔19مئی  (اے پی پی): سینیٹ ءِ چیئرمین سید یوسف رضا گیلانی ءَ نرسنگ کمیونٹی، پیرامیڈیکل اسٹاف ءُ جان سلامتی ءِ شوبگ ءَ گوں ہمگرنچیں درستیں مردم آناں شگر ءُ منت گپت ءُ گوشت کہ وانگ ءُ زانگ ءُ جان سلامتی منی دل ءِ نزیکیں شوبگ انت ءُ یک مھکمیں، دیمروئی کتگیں ءُ وشھالیں پاکستان ءِ واستہ کوالٹی جان سلامتی ءُ وانگ ءُ زانگ ءِ پجارینگ المی انت۔ میاں اوستمانی نرسانی روچ ءِ نیکیں موہ ءَ برجم داشتگیں مراگش ءَ گوں گشتانک دیان ءَ آئی ءَ گوشت کہ پاکستان ءَ اسپتال آنی کوالٹی انچیں بہ بیت کہ شھمکی علاج ءِ واستہ درملک ءَ روگ ءِ ضلورت مہ بیت۔ جوانیں جان سلامتی ءِ آسراتی پجاری ءِ واستہ ملتان ءَ مختیار ہسپتال جوڑ کنگ بوتگ۔ اے مراگش نامداریں انٹرنیشنل ہسپتال ءُ موون پک ہوٹل سینٹارس  ءِ کمک ءَ برجم دارگ بوتگ۔ چیئرمین سینیٹ ءَ گوشت کہ نرسنگ ءِ شوبگ طب ءِ ریڑھ ءِ ھڈ اِنت، ایشی ءَ چہ نہ ایوک ءَ گران تریں جاور آنی تہ ءَ نادراہ آنی ھیال داری کنگ بیت بلکینگ ءَ آھانی کھول ءِ مردم آناں ھمت، اُمیت ءُ دل یکیمی ءِ پجاری بیت۔ آئی ءَ گوشت کہ نرسنگ کمیونٹی ءِ ازمت انسانیت ءِ واستہ مزنیں مڈی اِنت ئُُ سرجمیں راج ایشانی قربانی ئُُ بے مٹیں ازمت آناں سلام اِنت۔ آئی ءَ گوشت کہ جان سلامتی ءِ شوبگ ءَ نوکیں اصلاحات وھد ءِ لوٹ اَنت ءُ پاکستان ءِ سینیٹ السی جان سلامتی ءِ نظام ءَ را مھکم، کارآمد ءُ نوکیں لوٹ آنی رد ءَ جوڑ کنگ ءِ واستہ جزمیگ اِنت۔ چیئرمین سینیٹ ءَ اے گپ ءِ سر ءَ دل یکیمی ءِ درشان کت کہ پاکستان نرسنگ اینڈ مڈوائفری کونسل بل 2026  ءِ سر ءَ دستخط کنگ بوتگ ایشی ءَ چہ نرسنگ ءِ وانگ ءُ زانگی ءُ کزبی معیار ءَ را جھان ءِ معیار ءِ رد ءَ دیمروئی دیگ ءَ کمک رسیت۔ چیئرمین سینیٹ ءَ گوشت کہ ٹیلی میڈیسن، آرٹیفیشل انٹیلی جنس ءُ نوکیں ٹیکنالوجی ءَ چہ جان سلامتی ءِ شوبگ ءَ انقلابی بدلی آرگ بوت کنت۔ آئی ءَ اے گپ ءِ سر ءَ زور پر دات کہ نوکیں لیکہ آنی سر ءَ نرس ءُ پیرامیڈیکل اسٹاف ءِ تربیت المی اِنت تانکہ پاکستان ءِ جان سلامتی ءِ نظام ءَ را جھان ءِ رہبند آنی رد ءَ دیمروئی دیگ بہ بیت۔ آئی ءَ گوشت کہ انسانی وسیلگ آنی تہ ءَ سرمایہ کاری اصل ءَ راجی برجائی، اقتصادی دیمروئی ءُ چاگردی وشھالی ءِ ضمانت انت۔ آئی ءَ گوشت کہ نرسنگ کمیونٹی ءَ را جوانیں کار ءِ چاگرد، یک وڑیں موہ ءُ کزبی دیمروئی ءِ واستہ گیشیں موہ آناں پجارینگ ریاست ءِ ذمہ واری اِنت۔ آئی ءَ گوشت کہ پاکستان ءِ تربیت یافتہ کارکنیں توان ءَ را سرجمیں دگنیا ءَ سک باز ارزشت دیگ بیت، اے گپ ءِ ثبوت اِنت کہ اگاں بنجاہی تک ءَ کوالٹی ءِ آسراتی ءُ تربیت پجارینگ بہ بیت گڈا پاکستانی ورنا جھان ءِ تک ءَ نامداریں جاہ ءَ سر بوت کن اَنت۔ سینیٹ ءِ چیئرمین سید یوسف رضا گیلانی ءَ گوشت کہ ملتان ءَ مختیار شیخ اسپتال ءِ جوڑ کنگ الس ءَ را گہتریں درمان ءِ آسراتی پجاری ءِ یک ھاسیں کوشست اِنت ءُ سرجمیں ملک ءَ ھمے رنگیں جدید ءُ کوالٹی میڈیکل سنٹر جوڑ کنگ بہ بنت تانکہ ھمک شھمکی وتی گس ءِ دپ ءَ کوالٹی الاج ءَ بہ رس ایت۔ آئی ءَ گوشت کہ کوالٹی طبی آسراتی ھمک شھمکی ءِ بنیاتی ھک انت مارا اجتماعی رنگ ءَ اسپتال آنی کوالٹی ءَ را گہتر کنگ لوٹ ایت۔ آئی ءَ گوشت کہ جان سلامت، مھکم ءُ وشھالیں پاکستان مئے درستانی یکجائی ویژن اِنت ءُ اے مول ءُ مراد ءِ سرجم کنگ ءِ واستہ حکومت، پارلیمنٹ، میڈیکل ایکسپرٹ، نرسنگ کمیونٹی ءُ الس ءَ را یکجائی ءَ کرد پیلو کنگی اِنت۔ نرسز ءِ میاں اوستمانی روچ ءِ موہ ءَ چیئرمین سینیٹ ءَ یک رندے پدا نرسنگ کمیونٹی ءِ راجی ازمت، بے وس ءُ مھمکبانی ءَ را شگر ءُ منت درشان کت ءُ گوشت کہ اے خیرخواہ آنی قربانی ءَ را راج دائم ءَ دلپروش کنت۔