وفاقی وزیر جان سلامتی ءُ ڈاکٹر ثانیہ نشتر ءَ جہانی جان سلامتی اسمبلی ءِ ساھت ءَ گند ءُ نند کتگ، ویکسینیشن کوریج ءَ را گہتر کنگ، شریکداری ءِ دیمروئی ءِ سر ءَ گپ ءُ تران

اسلام آباد۔19مئی  (اے پی پی):وفاقی جان سلامتی ءِ وزیر مصطفیٰ کمال ءُ ویکسینیشن ءِ واستہ میاں اوستمانی گل گاوی ءِ چیف ایگزیکٹو آفیسر ڈاکٹر ثانیہ نشتر ءَ 79می جھان ءِ جان سلامتی اسمبلی ءِ ساھت ءَ یک ھاسیں دیوان ءِ برجم دارگ بوت، ایشی ءِ تہ ءَ پاکستان ءَ ویکسینیشن ءِ آیوکیں شریکداری ءِ حکمت عملی ءَ را گہتر کنگ ءُ آیوکیں وھد ءِ شریکداری ءِ دیمروئی ءِ سر ءَ سرجمیں گپ ءُ تران کنگ بوت۔ وزارت جان سلامتی ءِ نیمگ ءَ چہ جاڑی بوتگیں بیان ءِ رد ءَ وفاقی جان سلامتی ءِ وزیر ءَ ڈاکٹر ثانیہ نشتر ءِ منت گپتگ ءُ گاوی ءِ ازمت آناں ساڑاتگ۔ زھگانی جان سلامتی ءِ رکھینگ ءُ ویکسینیشن کوریج ءِ تہ ءَ گیشی پاکستان حکومت ءِ اولی ترجی آنی تہ ءَ ھوار اَنت۔ آئی ءَ گوشت کہ راجی ویکسین پالیشی ءِ منظوری زرتگ ءُ ایشی ءِ جوانیں رنگ ءَ عملدرآمد ءِ واستہ عملی گامگیج کنگ بوھگ ءَ انت۔ آئی ءَ گوشت کہ پاکستان انڈونیشیا، چین ءُ سعودی عرب ءِ وڑیں ملک آنی تجربگ آنی چہ ویکسین ءِ بنجاہی پیداوار ءَ را دیمروئی دیگ ءِ واستہ سیت چست کنگ لوٹ ایت وھدیکہ اے درگت ءَ گاوی ءَ چہ تکنیکی رہشونی ءُ مشورہ ھم لوٹ کنگ بوتگ۔ وفاقی جان سلامتی ءِ وزیر ءَ کمیونٹی ءِ سرپدی ءِ ارزشت ءِ سر ءَ زور پر دیان ءَ گوشت کہ گوستگیں وھد ءَ میڈیا ءِ وسیلگ ءَ موثر سرپدی مہم ءِ نہ بوھگ ءِ سبب ءَ ایچ پی وی ویکسینیشن ءِ اولی بھر ءَ مزاحمت ءِ دیمپانی بوتگ۔ آئی ءَ گوشت کہ آئی ءَ وتی جنک ءَ را ویکسین کنگ ءَ چہ الس ءِ اعتماد ءِ بحالی ءِ واستہ عملی مثال پیش کتگ کہ ایشی ءِ آسر ءَ 80درسد ویکسین ءِ زورگ بوتگ۔ آئی ءَ شریکیں ادارگ آناں زور پر دات کہ آ شفافیت ءَ را دل یکیمی کنگ ءِ وھد ءَ میڈیا مہم آناں اسٹریٹجک منصوبگ بندی بہ کن اَنت تانکہ ایچ پی وی ویکسینیشن ءِ دومی بھر ءَ جوانیں آسراتی رسگ ءَ بہ بنت۔ مصطفیٰ کمال ءَ گوشت کہ پاکستان ءَ گاوی ءِ گوما وتی کو فنانسنگ ءِ ذمہ واری پیلو کتگ، اے حکومت ءِ عزم ءُ برجائی ءِ ھاسیں ءُ مھکمیں نشانی اِنت۔ وفاقی وزیر ءَ گاوی ءِ کمک ءِ ھم لوٹ کتگ کہ آ مشکل ءُ دوریں دمگ آنی تہ ءَ شش ویلنٹ ویکسین ءِ پائلٹ پروجیکٹ ءِ واستہ بہ کنت تانکہ آیوکیں وھد ءَ پنچ ویلنٹ ءَ چہ شش ویلنٹ ویکسین ءَ را رھادگ بوھگ ءِ راہ پچ بہ بیت۔ آئی ءَ گوشت کہ حکومت پولیو پروگرام ءُ ایمونائزیشن پروگرام ءِ نیام ءَ ھمگرنچی ءُ یکجاھی ءِ ھوالگ ءَ 2027ءِ میان ءَ تاں پیسلہ کنت وھدیکہ دوئیں پروگرام آنی کارکردگی ءَ را گہتر کنگ ءِ واستہ کلیدی عہدگ آنی سر ءَ گچینکاری ھم سرجم کنگ بوتگ۔ گاوی ءِ سی ای او ڈاکٹر ثانیہ نشتر ءَ وفاقی جان سلامتی ءِ وزیر ءِ منت گپت ءُ گوشت کہ پاکستان گاوی ءِ واستہ اولویت ءِ ملک انت ءُ تنظیم پاکستان ءَ ویکسینیشن کوریج ءَ را گیش کنگ ءُ کمیونٹی ءِ تک ءَ مزاحمت ءِ ھلاسی ءِ واستہ ھمک وڑیں کمک ءَ را برجاہ دار ایت۔ آئی ءَ شفافیت ءُ موثر رسانکدر ءِ مہم آنی سر ءَ زور پر دات ءُ مشکلیں دمگ آنی تہ ءَ شش ویلنٹ ویکسین ءِ پائلٹ پروجیکٹ ءِ حمایت ءِ یقین دہانی کت۔ ڈاکٹر ثانیہ نشتر ءَ پاکستان ءِ نیمگ ءَ کو فنانسنگ ءِ ادائیگی ءَ را سرکاری ملکیت ءُ برجائی ءِ نیمگ ءَ یک ھاسیں ءُ جوانیں گامگیج لیک اتگ۔ آئی ءَ گوشت کہ گاوی ٹیم پاکستان ءِ ویکسینیشن پروگرام ءَ را گیش مھکم کنگ ءِ واستہ کمک پجارینگ ءِ واستہ تیار انت۔