گورنر خیبرپختونخوا تون پشتون قبائلی ڈل انا اوڑدہی، صوبہ ءِ مون تروک ویل آتا بارواٹی گپ وتران

اسلام آباد۔ 18 مئی (اے پی پی ) گورنر خیبرپختونخوا فیصل کریم کنڈی تون عنایت اللہ محسود نا کماشی ٹی پشتون قبائلی ڈل گورنر آفس اسلام آباد اٹی اوڑدہی کرے ہراٹی صوبہ ءِ مون تروک ویل و اونا گمانی ایسری نا بارواٹی گپ وتران کننگا۔ دوشنبے نادے آ گورنر آفس آن جاری بیان نا رداٹ جرگہ باسک آک صوبائی  ویل آتا ایسری کن فیصل کریم کنڈی نا کڑد انا ستاءِ کرسا پاریر کہ نی مچ آ صوبہ نا گچین وڑاٹ ترجمانی ءِ کننگ اُس۔ اوفتا پاننگ ئس کہ خیبرپختونخوا نا غٹ قومک گورنر نا مثبت کڑد و کوشست آتا معترف ءُ ہرا ویل آتا ایسری کن سنجیدگی اٹ گام گیج کننگ ءِ۔ ڈل ساڑی آ دے راولپنڈی ٹی اِرا ورناتا خون نا است ہسون واقعہ غا گورنر نا گچین و مثبت کڑد ءِ ہم خراج تحسین پیش کرے و اومیت ظاہر کرے کہ داوڑنا گام گیج آتیان انصاف نا فراوانی ءِ پک کننگ مریک۔ داوخت آ گورنر فیصل کریم کنڈی پارے کہ ہرویل انا پائیدار ایسر کانود نا بالادستی ءِ امنا کننگ و تین پہ تینی مذاکرات اٹی اودیم ءِ۔ اوداہیت آ زور شاغا کہ پشتون ملک انا چندی بشخ آتیٹی پُرامن وڑاٹ کاروبار و زند ءِ تیر کننگ ءُ ہنداسوب آن انفرادی جھیڑہ غاتے اجتماعی یا قومی رنگ تننگ جوان اف۔ گورنر پارے کہ قوم تا سرکڑدہ غاتیا دا زمواری مریک کہ او باندات آتے پامداری اٹ ایسر کیر۔ اوپیدوار کرے کہ کانود نا عملداری ءِ پک کننگ، ڈوہدار تے سزاتننگ و آخبت اٹ داوڑنا واقعہ غاتا توننگ بھاز المی ءِ تانکہ راج اٹی امن و سوگوی ءِ برقرار تخنگ مرے۔