پاکستان نا 79 مخصوص ضلع غاتیٹی پولیو تور نا خصوصی مہم نا بناء

اسلام آباد۔ 18 مئی (اے پی پی ) حکومت پاکستان نا کماشی ٹی نیشنل ایمرجنسی آپریشنز سینٹر انسداد پولیو (اینو) آن مچ آملک انا 79گچین مروک ہائی رسک ضلع غاتیٹی پولیو تور مہم نا بناءِ کرینے۔ دامہم پولیو نا پورو چٹفنگ و لکھ آ چناتے مچ آ وئی نا معذوری آن رکھ تخنگ کن قومی کہول آ برجا سوگو کوشست آتا اسہ اہم ءُ بشخ اسے۔ دا مہم 18 آن 24 مئی اسکان برجاسلک، ہرانا مسخت پنچ سال آن کم وئی کم و ود 1 کروڑ 90 لکھ چناتے پولیو آن بچفنگ نا پڑی کُنفنگ ءِ۔ داقومی مہم اٹی 1 لکھ 60 ہزار آن زیات تربیت یافتہ فرنٹ لائن ورکرمچ آملک اٹی ہراُراغا ہنسا داہیت ءِ پک کیرہ کہ ہر چناءِ مچ آ زند معذوری آن رکھ تخوک آ دا ویکسین ءِ فراوان کننگے۔ دامہم پاکستان و اوغانستان اٹی اسہ وخت اٹی اڈتننگ انگ ءِ، ہرا ہڑتوم آ ملک آتا نیام اٹ سوگو کمکاری و دنیا نا آخیریکو ایلو ماندہ علاقہ غاتیٹی پولیو دین انا چٹفنگ نا اسیجائی عزم ءِ پاش کیک۔ صوبائی کہول آ پنجاب نا 10 مخصوص ضلع غاتیٹی 61 لکھ 90 ہزار چنا، سندھ انا 20 مخصوص ضلع غاتیٹی 57 لکھ 90 ہزار چنا، خیبرپختونخوا نا 23 مخصوص ضلع غاتیٹی 46 لکھ 10 ہزار چنا وخت اس کہ بلوچستان نا 25 مخصوص ضلع غاتیٹی 19 لکھ 90 ہزار چناتے پولیو آن بچفنگ نا پڑی کنفنگک۔ اسلام آباد اٹی ہم 4 لکھ 60 ہزار آن زیات چناتے دا مہم اٹی ویکسین تننگک۔ پاکستان اٹی پولیو نا برخلاف جہد اسہ بھلو سفر اس طے کرینے۔ ہراتم 1994ٹی قومی پولیو تور مہم نا بناءِ کننگا تو ملک اٹی سالانہ 20،000آن زیات کیس رپورٹ مسکہ، دہائی تیا تالان پدریسہ ویکسی نیشن مہم، سوگو چاروکی نا نظام و سوگو گام گیج آتا سوب ملک دا ناجوڑی نا بھاریم اٹی نمان کمتی دوئی کرینے۔ دا پیش رفت مثبت نتیجہ غاتا ڈیک ءِ۔ پاکستان اٹ سال 2025اٹی 31 پولیو کیس رپورٹ مس، وخت اس کہ 2026اٹی داتم اسکان بیرہ 3 پک مروک کیس مون آ بسنے۔ دانمان کمتی ملک اٹی پولیو نا چٹفنگ نا کنڈآ سوگو پیش رفت ءِ ظاہر کیک۔ ولے ، جان جوڑی نا کمامدارآک خبڑدار کرینو کہ گڑاس علاقہ غاتیٹی دین داسہ ہم چُپی اٹ پیری کُننگ ءِ ، ہرانا رداٹ پدریسہ ویکسی نیشن نا کوشست المی ءِ۔ نیشنل ایمرجنسی آپریشن سینٹر تینا بیان اٹی پارے کہ‘‘پاکستان پولیو آن پاک آخبت نا کنڈآ اسہ سفر اسے اسہ فیصلہ ئی ءُ ریسہ سے ٹی پترینگانے۔ دُن تو پیش رفت است بڈءِ، ولے ہر ہمو چنا ہرا ویکسین آن محروم مریک، دین نا زندہ سلنگ و تالانی کن اسہ موقع اس فراوان کیک۔ جان جوڑی نا کمامدار آک داہیت آ زور شاغانو کہ وار وار ویکسی نیشن بے کچ المی ءِ، انتئے کہ ہر خور چنانا قوت مدافعت ءِ پین سوگو کیک و دین نا گدریفنگ ءِ توننگ اٹ کمک فراوان کیک، خاص وڑاٹ زیات خطرہ غاتا گواچی و ہن و بر کروک آ بادی تیٹی ءِ۔ حکومت پاکستان جی پی ای آئی نا شریدار ادارہ، ہرافتے ٹی جہانی ادارہ جان جوڑی، یونیسیف ، سی ڈی سی، روٹری انٹرنیشنل و گیٹس فاؤنڈیشن اوار ءُ، نا پدریسہ کمکاری نا ستاءِ کرینے۔ حکومت پارینے کہ صوبائی حکومت، فرنٹ لائن ورکرز، سیکورٹی کارندہ، کمیونٹی راہشون و ہندی شریدار آتا اسیجائی کوشست ہرچنااسکان رسینگ نا ہدف نا دوئی کننگ اٹ بنداوی اہمیت تخک۔ لمہ و باوہ و سرپرست آتیان خواست کننگک کہ او پولیو ٹیم آتا تینا اُراتیٹی خیرمقدم ءِ کیر و داہیت ءِ پک کیر کہ مہم اٹی پنچ سال آن کم وئی نا غٹ چناتے پولیو آن بچفنگ نا پڑی کنفنگے۔ نیشنل ایمرجنسی آپریشنز سینٹر پدریسہ گام گیج، گچین رسینگ و اجتماعی زمواری نا کمک اٹ پاکستان ءِ پولیو آن پاک جوڑ کننگ نا تینا عزم انا درشانی ءِ کرے۔ پولیو تور مہم نا بابت معلومداری کن شاری پولیو ہیلپ لائن 1166 آ رابطہ کننگ کیرہ یا وٹس ایپ ہیلپ لائن 03467776546آ وٹس ایپ کلہو مون تننگ کیرہ۔