گچین کارکڑد نشان تروک آ وزارت آتے شونداری ڈٹ آتیکن اولیتی بنداو تیا بجٹ فراوان کننگک، وزیراعظم نا شونداری بجٹ نا ڈٹ آتیا جاچ دیوان اٹی گپ وتران

اسلام آباد۔ 18 مئی (اے پی پی ) وزیراعظم محمد شہباز شریف پارینے کہ گچین کارکڑد نشان تروک آ وزارت آتے شونداری ڈٹ آتیکن اولیتی بنداو تیا بجٹ فراوان کننگک، ہمو شونداری ڈٹ آتیٹی الس نا پیسہ غاتے خلینہ ہرافتا بھرم پک مرے، دِیر انا کوڑی و پن بجلی نا ڈٹ آک شونداری بجٹ خڑچ کننگ نا اولیت آتیٹی اوار ءُ، دِیر انا کوڑی تے ودفنگ نا ڈٹ آتے اولیت تننگک۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم نا کماشی ٹی برجاسال انا شونداری بجٹ و بروک آ مالی سال اکن شونداری بجٹ (پی ایس ڈی پی ) نا ڈٹ آتیا جاچ دیوان اس مس۔ دیوان اٹی نائب وزیراعظم و وزیرخارجہ سینیٹر محمد اسحاق ڈار، بنجائی وزیر احسن اقبال، احدخان چیمہ، محمد اورنگزیب ، رانا تنویر حسین، شزافاطمہ خواجہ ، حنیف عباسی، سردار اویس خان لغاری، میاں محمد معین وٹو، عبدالعلیم خان، ڈاکٹر خالد مقبول صدیقی، وزیر مملکت بلال اظہرکیانی، خصوصی کمکار ہارون اختر و تعلقدار بڑزکو کمامدارآک بشخ ہلکر۔ وزیراعظم پارے کہ گچین کارکڑد نشان تروک آ وزارت آتے شونداری ڈٹ آتیکن اولیتی بنداوتیا بجٹ فراوان کننگک، داوڑنا شونداری ڈٹ آتیٹی الس نا پیسہ ءِ خلینہ ہرافتا بھرم پک مرے۔ وزیراعظم پارے کہ دِیر انا کوڑی و پن بجلی نا ڈٹ آک شونداری بجٹ خڑچ کننگ نا اولیت آتیٹی اوار ءُ۔ وزیراعظم پانڈا بانڈز انا سرسہب جاری کننگ و اونا مارکیٹ اٹی پذیرائی آ وزیرخزانہ نا ستاءِ کرے۔ دیوان اٹی وزیراعظم ریلوائی، آئی ٹی و وزارت پاور نا کارکڑد نا ہم ستاءِ کرے۔ وزیراعظم پارے کہ شونداری ڈٹ آتیٹی پبلک پرائیویٹ پارٹنر شپ انا زیات آن زیات است بڈی ءِ کننگے۔ اوپارے کہ دِیر انا کوڑی تے ودفنگ نا ڈٹ آتے اولیت تننگک۔ دیوان اٹی برجاسال انا پی ایس ڈی پی آ جاچ و بروک آ سال انا سلاہ ئی شونداری ڈٹ و اوفتے کن درکار فنڈآتیا سرجم آتیان معلومدار کننگا۔ دیوان ءِ قومی وڑنا دِیر کوڑی کننگ و پن بجلی نا ڈٹ بشمول داسو، دیامربھاشا و مہمند ڈیم تا تفنگ آ پیش رفت آن ہم معلومدار کننگا۔